智取大市：港股變救市大輸家
股市危機嘅源頭，永遠係大家感覺良好之際先會出現。
港股反彈咗接近兩星期，好多人開始認為危機已經過去，唔通大家覺得恒指喺25400點，相比23000點更安全？晉佳就認為，現價持貨值博率甚低，北水乾塘，中央入市又唔關H股事，邊個有本錢同你炒高港股？
要升到27000
點，就要有更利好的消息出現，不過，好消息似乎已經出得七七八八。
A股市場廢武功
有報道講到中證金有2.5萬億至3萬億元人民幣嘅入市掃貨彈藥，連同券商，最近入市規模已經達到萬幾億元人民幣，但只係勉強填補兩融餘額減少同埋配資遭斬倉嘅缺口，未見到中央能夠為A股注入大升的動力，原因係斬倉潮過後，即使中央入市，大陸人冇得借錢炒股，就冇人有條件衝。
除咗冇槓桿之外，中央同時亦唔准大股東、管理層於半年內沽貨，呢一著雖然令沽壓減少，但同時亦等如封鎖大股東、管理層的流動資金，並且令A股失去抵押、融資及套現功能，等同令股票市場廢掉武功。
遠嘅唔講，港股將會成為短期受害者。A股仍有中央死頂，至於港股繼續變孤兒仔，冇新嘅北水湧港，同時外資對中資股已經多幾分顧忌，港股未來數個月會相比A股更弱，甚至兩者走背馳，A股唔跌，港股都可能要跌，乜嘢大折讓都唔會有人理。
港股呢幾日成交繼續縮減，連續三日成交低過1,000億元，噚日更縮減到唔夠900億元，指數方面，冇大上落，理論上係待變格局。但有咁多救市注資QE消息之下，港股都咁削，五個字講曬，好消息唔升。
好消息唔升之下，反彈市係咪即將結束？之後有冇條件破底？
最直接係睇成交，如果跌市單日成交超過1,000億元，即係話，沽貨動力相比起買貨動力更大，後市難免向下，港股中短期內嘅功能，只可以淪為提款機，內地A股冇得沽貨，如果稍後有壞消息，要沽貨點都要揀港股，港股只有下跌空間而欠缺上升空間，更成為今次中央暴力救市大輸家。
個股嘅話，至少包括內地券商在內嘅中資金融股，一定跑輸大市，相比其他中資股更傷。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文