金手指：Glaucus曲線讚
■簡志堅任主席的中國天然氣，被研究機構Glaucus指係「真空殼」。 資料圖片
今日孫柏文想講嚇被研究機構Glaucus叫不問價沽嘅中國天然氣（931）。禮拜日，該公司嘅老闆簡志堅瞓醒忽然想開緊急記招，我都有網上睇佢嘅說話。
呢間公司我一向冇研究，原因係
我好怕一啲叫自己做「中國xxx」但又唔係國企嘅公司。因為我成日諗，橫豎都係，攞中國天然氣做例子，不如叫自己做世界天然氣甚至宇宙天然氣，六分之一地球人點夠雄心壯志呀？
中國天然氣股民擔心
點都好，對小股民來講，簡志堅講話有幾點好重要。首先，佢話公司現金，如果攞出來買起小股東，可以出0.58元一股。
所以佢話如果落到去嗰個位，就會出手私有化。佢咁講，最頭痕將會係佢個公關，因為變相令0.58元做目標價。噚日收市1.3元，即Glaucus話要跌九成幾先買，簡志堅就好啲，跌五成就買。
咁佢又好幾次話「央企」支持佢。佢一咁講，我就諗起兩個人，第一個就係啱啱見過唔知邊個中央高官，話中央好Q肯定佢嘅特首梁振英，同埋前輩周顯兄。諗起周顯兄嘅原因，就係佢用同一理由，又係因唔知大陸邊個勁撐，喺幾個月前笑所有拋空漢能能源（566）嘅人（包括我）會「輸到褲都要除埋」。
不過，我嘅解讀係Glaucus係好肯定咁話中國天然氣唔係漢能。因漢能被外界指為「偽企業」，而Glaucus只係話中國天然氣係「真空殼」。而以黎智英多年話做真小人好過偽君子嘅邏輯，Glaucus今次其實係曲線讚中國天然氣。
其實今次最令股民擔心嘅，係簡志堅出來講嘢嘅時刻。點解？要大獲全勝嘅方法好簡單，只要股價上番去報告前嘅1.5元，先接受記者訪問，而簡單答一句：「佢哋啲觀點，起碼市場唔信先。」咁就KO對方。而家已講嘢，係咪因冇能力見報告前嘅價位呢？咁做小股民仲唔擔心？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文