陸羽仁 BLOG 2015年7月21日
齋升巨股
2015/07/21 09:19:41
網誌分類: 經濟
全球股市昨日都比較平靜，美股三大指數基本持平，杜指升14點，收報18100點；標普500指數升2點，收報2128點，納指微升9點至5218點，納指中段一度升上5219點，再創歷史新高。
倒是商品市場就大波動。美元匯價繼續上
升，反映美元兌6隻主要貨幣匯價的美元指數衝破98，令到大宗商品市場繼續受壓，紐約油價跌1.5%至每桶50美元邊皮，亦拖累能源股下挫，杜瓊斯能源指數昨日逆市下跌1.3%，係壓住大市的元兇。黃市更係重災區，金價昨日一度失守每安士1100美元，跌4%低見1088美元嘅5年多新低。昨日金價在亞洲時間大跌，因為有人在上海5分鐘內大手沽出5噸黃金，當地每日成交只有25噸，咁沽法馬上沽散咗金價，可能內地空軍唔俾沽股票，轉行沽金搵食。
紐約油價由去年7月的大約96美元，跌到今年頭的50美元下方，至5月反彈上60美元樓上，6月底開始下滑，主要因為中東增產、伊朗核談判達成協議和美國加息升溫，美元上升，令油價大跌超過10%，跌番去年頭低位。昨日，石油服務巨頭哈里伯頓公司(Halliburton) 公布第二季度財報，季度利潤就較去年同期暴跌93%，不過，仍然高過市場預期，可見市場對於能源企業表現幾咁悲觀。哈里伯頓昨日跌8%至40美元，比較去年同期的73美元，已經暴跌了45%！
不過，多家大銀行對未來油價又唔係睇得太淡，其中摩根大通認為夏天係汽油用量高峰期，煉油業的產出量於8月亦會達到頂峰回落。預計紐約油價第三季會回升至每桶58美元，第四季接近60美元。巴克萊銀行分析師則認為，石油跌到呢個價錢，生產頁岩氣已經無利可圖，供應會大幅減少，另外，市場對於伊朗核談判達成，伊朗經濟制裁解封，可以大量增加石油出口過度樂觀，因為不少專家都認為，期間伊朗仍要經歷一段頗長的時間才可以大量輸出石油，因為重置產油設備以及簽訂商務合約在在需時。不過，巴克萊估計油價要明年，甚至後年才會回升較高水平，然而，會比目前市場預期的為高。
美股納指創咗新高，但杜指未上高位，有美股分析員留意到即使上周五谷歌大升帶動納指向上時，納指成份股的升跌比例都係兩隻升對三隻跌。真正原因是美股這次升市範圍好窄，主要升一些搶眼大股，標普500指標只升三大類:科技、金融和衛生用品，特別是科技類，佢佔標普500指數20%，是最大類別，而科技之中，又主要升四隻股，單計7月，谷歌升29%、亞馬遜升11%、面書升10%、蘋果升3%，只是7月三個星期就升咗咁多!
而且這些公司市值極大，推動指數能力好強，如蘋果市值7470億美元、谷歌4680億美元、面書2680億美元、亞馬遜2200億美元，夾埋有1.7萬億美元，而整個納指市值亦只有5.4萬億，即係四大股已佔納指31%市值，所以只是佢地幾隻大升，就推動納指創新高。
結果納指7月至今升了6%，標普500指數只升了3%(即使納指四大科技股也包括在標普500之內，但標普有500隻成份股較分散)。這令納指比其50天移平均線有多過3點的標準差(只有1%機會出現)，而自1980年以來，有9次出現這種情況，其中8次隨後一周指數都跌。
結論是美股並非普升，看來難以持久，炒埋蘋果公布業績就散水，所以炒美股帶動那些類別的港股要睇路。
廣告時間:
陸羽仁新書《順勢•逆勢》出版，有簽名書在書展發展，地點是泛華發行的書展攤位1B-A16(綜合書刊館)。
陸羽仁
回應(1) 我想回應
陸羽仁 BLOG 舊文