笑到最後 - 高明 2015年7月27日
笑到最後：回去救國吧，李小加
暴力救市後盡見國家金融人才不足，國家正值用人之際，難得香港有一員金融猛將、港交所（388）行政總裁李小加，既有強烈的A股思維，亦都係著名的海歸派，香港人唔好再霸住李小加，放生佢去A股救國。至於點解李小加會適合救國多於留喺港交所，由佢的言論得知，至少有三大原因。
三理由離開港交所
一、李小加6月底講過，「A股是世上最安全最透明的市場」。高明一聽，就知佢有弦外之音，即刻上港交所查嚇滬股通成交額，6月平均成交113.6億元人民幣，喺李小加講完之後，7月至今成交額跌至97.8億元人民幣，如果撇除7月2日至10日瘋狂沽壓，「新常態」下滬股通平均成交只得57.7億元人民幣，同6月A股股災月比冇咗一半。
所以，李小加同志是對的，對外資嚟講，A股係最安全，因為已經冇參與，當咗A股透明。
二、李小加又決定出年引入停板機制（語言偽術稱為「冷靜機制」，呢個名留返畀啲填鴨用），防乜嘢「閃跌」，先涵蓋指數股，結果有啲似商鞅作法自斃，港交所即刻示範「跌停板」，7月6日跌最多14%，7月8日跌最多12%，但之後升返喎，冷乜靜。
如果每次觸發停板機制，主席及行政總裁啲股份同認股權都要冷靜多半年先准沽，且由港交所率先試行三年，咁高明又服喎！此乃後話。
港交所話「建議乃配合20國集團（G20）及國際證監會組織（IOSCO）」，明顯係「外國勢力幹預、亂我中華」之舉，究竟港交所係中國人話事？定係洋人話事？最慘嘅係，有華文作者支持外國勢力幹預嘅停板機制，嗰啲華文作者係愛邊個祖國，令人側目。
香港呢個外國勢力基地，連李小加都冇符，不過，所謂先安內後攘外，內地自稱畀外國勢力惡意沽空，李小加同志雖然喺香港先輸一仗，但只係因為香港有自由，警察無法向惡意沽空者執法，如果李小加返中國救市，配合公安執法，一定更加得心應手。
三、李小加任內最偉大功績係延長交易時段，政策盡顯中國小農DNA智慧，多勞多得，以為股票好似耕田咁，鋤多兩粒鐘就會多啲收成，實施以嚟成交毫無寸進，要等到北水湧港先有幫助。但係如果呢招返大陸，可能有效，始終中國大媽不如港人斯文，廣東道式搶鬧，一定會伸延至股市，得李小加，A股成交衝破十萬億元可期。
反觀，今次股災，香港一冇跌停、二冇救市、三冇搵警察去交易所拉啲淡友，港交所只要有個人坐喺度就得，之後市場自行運作，唔使搞咁多花臣，曲線證明香港浪費咗李小加呢位人才。所以，李小加同志，國家需要你，你都係升職返中國救市啦。
高明
即上偶像派財演專頁：
https://www.facebook.com/bigricetea
本欄逢周一刊出
高明
笑到最後 - 高明 舊文