一周三件：花樣年瓣數多
■潘軍任主席的花樣年，今年上半年內地樓盤銷售勝預期。 資料圖片
花樣年（1777）今年上半年有靚仔銷情仲未止，食住廣東省尤其深圳樓市大熱，嚟緊日子，掂過碌蔗。廣東省房協數據，今年上半年該省商品房銷售面積4,827萬平方米，同比增加25.5%，銷售額4,623億
元人仔，同比增加32%，雙雙創出同期歷史新高。
又據戴德梁行統計，單喺深圳，全市上半年一手住宅成交量，同比大增121%，創咗2009年以嚟同期新高。
中期銷售增逾倍
睇番花樣年，集團喺廣東珠三角土儲樓面面積，佔咗本身總土儲近40%，當中又以深圳比重最大。成張picture係，祖國樓市喺阿爺多重政策底下，今年回暖，但仍以好似深圳呢類一線城市最火熱，花樣年亦食到應一應。事實亦係咁，花樣年月頭公佈今年上半年銷售數據，總實現銷售額近40.5億元人仔，大增125%，集團兼對全年銷售成績預期樂觀。
場內專業評估，花樣年今年EPS同上年差無幾，但到明年同2017年，隨住銷售入賬，增長嚟料，兩年EPS去到0.33同0.4元，增長22%同21%，2016同2017年預測PE，得3.4同2.7倍，平到痹。好嘢未講完，花樣年上年分拆主打物業管理嘅彩生活（1778），經資本化後，彩生活股價升值，暫時已為花樣年帶嚟近31億元增值。又除咗彩生活，花樣年近年亦拓展養老服務，同小額貸款、融資租賃、P2P網上金融。呢兩大瓣數發展潛力同樣勁厚，花樣年煲得掂，一樣可以搞分拆上市，肥仔增值在後頭。
唔扯咁遠，單係計本身土儲，同上邊彩生活增值，花樣年NAV已經可以由上年尾2.06元，大升到5.3元，現價（1.13元）PB，得0.21倍！煲花樣年，當上番大行花旗所畀2.1元目標價，花樣年係要升86%，到時明年度PE只係得6.3倍。
錢雋
細價股專家
本欄逢周一、三、五刊出
錢雋
一周三件 - 錢雋 舊文