魚樂無窮：低調國企爆升有玄機
■五菱汽車最新市值15億元。圖為集團執行董事孫少立。 資料圖片
五菱汽車（305）上月中宣佈供股，五供一籌2.1億，供股價0.7元，較當時市價折讓16%。7月股災淹至，五菱汽車失守供股價，一度低見0.42元，其後一直於0.7元水平整固。
正當大市處於災後
回氣期之際，五菱上周四及五突然發力，連升兩棍，完美收復7月失地，重返宣佈供股時水平。睇番通告，上周四正正係接納供股嘅最後日子，此時應聲抽高，必有玄機。
先來個大膽假設︰股價於0.7元徘徊多時，剛巧與供股價一致，不排除有無形之手力壓，喺冇肉食情況之下，小股東自然放棄供股，如此一來，大股東及一致行動人士持股，最多可增至74.9%，貨源更加歸邊。
點解要咁做？一齊嚟小心求證︰五菱汽車主要產銷發動機及部件、汽車零部件及附件等，曝光率甚低，卻大有來頭。大股東柳州五菱汽車，由廣西國資委掌控，屬根正苗紅嘅國企。集團月中以4,820萬人仔，收購重慶生產設施，大股東柳州五菱汽車同時宣佈易名廣西汽車集團，連同供股集資所得用於向附屬五菱工業增資，一連串活動惹來系內重組憧憬，透過供股鞏固控股權，令重組更順利，變得理所當然。五菱汽車最新市值只得15億，可塑性大到你唔信，0.8元樓下吸納，用一成溢價博單車變摩托！
唐牛
https://www.facebook.com/tongcow88
唐牛
魚樂無窮 - 唐牛 舊文