中環在線：軒尼詩道分行快關門
恒生客周圍撲保險箱
■3年未夠，恒生提供保險箱服務的分行又再有變動。
最近跟闊太M傾偈，佢話最近煩緊四周圍搵保管箱，記得佢2012年底先至由恒生銀行（011）中環分行搬去恒生灣仔軒尼詩道200號分行，3年未夠，因乜事又要搵保險箱，莫非佢呢幾年買落好多樓、
好多股票，所以要搵多個箱先至夠擺屋契與股票？佢即刻耍手擰頭，話係恒生打算閂分行，要佢再搵箱搬呀！
同區分行推保險箱服務
老實講，華華做女嗰陣都唔知保管箱有幾咁重要，後來有幾件龍鳳𠼦，加埋乜乜物物證書，走去搵保管箱時，先知銀行保管箱供不應求，尤其可以平放證書size嘅大箱，要排隊先至有。
喺銀行角度，每個箱一年租金平均千多元，又要地方，又要安排保安，可謂一門雞肋生意，唔願做都係正常嘅。
2012年恒生位於中環中建大廈嘅分行搬過去陸佑行，陸佑行冇保管箱服務。闊太M當年搵咗一輪，先至喺恒生軒尼詩道分行搵到個大箱，點知最近收到分行職員通知，話呢間分行打算關門大吉，叫佢再去搵箱，佢簡直覺得晴天霹靂。
恒生公關承認，佢哋計劃今年第四季調整灣仔區嘅分行服務，好消息係將會擴充莊士敦道分行（前龍門酒樓位置），增設保管箱服務，客戶到時可以登記，銀行再作安排。至於闊太M係咪可以冇縫交接咁，由軒尼詩道分行，轉用莊士敦道分行嘅保管箱呢？公關暫時就畀唔到答案嘞。
軒尼詩道分行又點處理呢？公關話佢哋仲諗緊。據聞恒生有一半分行屬自置物業；今年初佢哋就將一個旺角分行地舖租畀周大福（1929），為股東爭取較大回報。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文