金融High Tea 2015年7月2日
捱餘震 信阿爺
2015年07月02日
假前港股喺六月結前最後一個交易日反彈，內地股市都由急跌轉急升，單日上落超過10%，帶住恒指在周二放假前都升番1.1%。但昨日香港回歸放假但內地有市，上證綜指上午只係跌1%，下午兩點後最後一個鐘變臉大插，結果7月第一個交易日未能開門紅，上證綜指又暴
跌逾5.2%收場，收4053點，又在4000點大關前掙扎，有逾800隻股跌停板。
可能見股市跌得超乎預期，中證監昨晚緊急在微博發出通知，即時放寬孖展斬倉規限，同時滬深證交所和中國證券登記結算公司公佈，擬下月起調低交易費用，齊齊出招幫股市止咳，以免由牛牛變成「快熊」。
中證監漏夜出招救市
昨晚又傳嚟消息，希臘在拖欠國基會貸款後，總理齊普拉斯曾去信債權人，稱願意有條件接納債權人的緊縮方案，大為紓緩談判緊張氣氛，加上昨日歐羅區公佈的六月份製造業採購經理指數(PMI)符合預期，帶動歐美股市昨日早段顯著造好，杜指初段亦高開113點，見17732點，德法股市中段曾分別升2.4%和2.6%。
美歐股市隨希臘起舞
我估內地市再插，以八級地震後的餘震計，隨時都有五級，睇落好得人驚，但殺傷力遠低於第一次地震。阿爺周初密密出招護盤，到周二內地市反彈好似回穩，阿爺無再出招，個市又發作發晒軟蹄，都係好正常的事。今日港股會受壓，但應該死唔到人，因為內地再插，阿爺又會出手。中央一招唔得，仲有下一招，佢口袋裏面仲有好多招數未出，總之淡定有錢剩，唔好在呢啲低位被佢嚇親，依家走去清倉。
六月份A股跳崖式下插，頗有解脫式下跌的味道。調整絕對唔係壞事，除咗讓高位沽咗貨的投資者有機會可以低位撈平貨外，最重要係內地個市四、五月一枝箭咁上升，馬步不穩，遲早仆直，照咁升法年底升到一萬點，想唔爆都難。依家停一停、唞一唞，調整步伐，仲有利後市。
呢次個市急插，有中環茶友慨歎，自己低位買得唔多，高位亦都沽得唔多，執來執去只係執到散紙啫！陸羽仁的回應是，執多執少唔緊要，最緊要有賺。如果唔講投機，只講投資，最穩妥嘅方法係低位建倉，見高就沽少少，唔好沽清，見低就買啲，除非覺得個市會爆煲，否則無需要大出大入，時時清倉、時時滿倉咁大動作，皆因個市影響因素太多，唔可以話百分百睇準，用部份倉位高沽低揸，長玩長有反而最有把握賺錢。
好似呢次A股爆上5000點，又插番穿4000點，搞到恒指上破28000點，又落番26000幾點，陸羽仁個倉在高位都減啲磅，依家逐步買番，咁樣一上一落最後手頭的股票差唔多，平白多出嚟的錢，就係真正賺到的錢嘞。投資係細水長流，慢慢讓利潤滾動，唔好睇佢開頭回報郁得好慢，累積時間愈長，賺嘅就會愈多。呢種以慢打快的招數，遇着好似上半年咁波動的市況，就最派得上用場，反而好多叻仔快出快入，想三幾個月翻幾番，好易就俾人摑到頭青面腫。
入濠賭股 未到時候
睇番上半年港股整體大市，受A股掀動，大上大落，恒生指數上半年飆升2645點或11.2%，國企指數跑輸恒指，上半年升997點或8.3%，升幅相當唔錯。
港股進入「大時代」，每日成交激增，港交所(388) 應聲彈出，股價第二季高見311.4元，刷上市新高，上半年累升近60%，榮登藍籌升幅之王。爆冷藍籌係備受管理層醜聞纏身插水的華創(291) ，突然向母公司華潤集團出售非啤酒業務兼派特別股息，半年大升54%，成為藍籌第二大升幅成股份。科網龍頭騰訊(700) 業績創季度新高，加上政策力挺「互聯網+」，推動股價累升38%。
失運股份則有澳門博彩股，由於賭收連跌12個月，金沙(1928) 、銀娛(027) 半年分別大跌31.59%及28.69%，成為表現最曳藍籌股，我一年前開始講澳門賭收唔掂，叫大家唔好掂濠賭股，希望幫到大家。睇番金沙和銀娛兩間公司市盈率分別係10倍、12倍，表面數字唔高，但估計未完全反映收入回落盈利可能下跌的因素，加上各大賭業公司陸續有大量新場投入，需求下降供應增加，唔係好現象，短期仲未能睇好濠賭股。
陸羽仁
金融High Tea 舊文