智取大市：綠地價殘博反彈
內地貿易數據本來就係non-event，難影響股市，大家過往都見識過中央過往如何操控進出口數據，所以突然好勁同突然好差，都未必同實質經濟有關。
今年內地7月份進出口按年跌超過8%，有兩種陰謀論可以解釋，第一，專登做醜樣啲條數，就可以容許人行減息、降準；第二，
中央想貿易數據變番真實啲，嚟提升人民幣出年納入特別提款權（SDR）嘅機會。呢兩項因素亦可能影響7月貿易數據好壞。
其實，當你睇到H股指數市盈率去到單位數，已經知道估值包含咗衰退價，即使進出口數據所謂差過預期，亦早已經反映於市價之上。噚日港股朝早跌超過400點，擺明對進出口數據嘅壞消息過份敏感，其後恒指即市跌幅大為收窄，H股指數仲要跌轉升，非常合理。
另一重點，係投資者對於利淡消息開始麻木之際，中資股股價處於短期低位，加上成交少，造就反彈市出現，噚日A股升半成，自然令資金搶高低殘中資股。
晉佳相信呢個反彈只係熊市唞氣位，但觀乎港股熊市歷史，呢類反彈短則幾日，長則維持幾個星期都唔奇，始終熊市亦不可能股市日日跌不停，總要喺投資者冇信心之際，做一個似模似樣的反彈，先能夠引人落疊去接貨。目前只係反彈初期，短線應有水位，如果閣下冇乜股票喺手，不妨預一部份注碼買低殘中資股博短線反彈。
短線見底機會大
至於有乜方法可以判斷反彈浪完結？睇成交。呢類死貓彈通常等到成交明顯增加，連散戶都重燃信心入市之際，先至嚟喺高位散水，相信要等港股整體成交回升到1,200億元以上，先至響起警號。
綠地香港（337）喺5月初曾創高位8.6元，跌到7月8日嘅2.97元，即使噚日反彈到4.49元，相距高位仍低接近50%，加上近期未見明顯反彈，股價都算幾殘，符合博反彈條件。
綠地香港今年4月夥拍阿里旗下螞蟻金服，以及平保（2318）陸金所，推出互聯網金融產品「地產寶」，呢個產品係類似房地產信託產品，雖然未知合作前景，但講緊螞蟻金服同陸金所都係內地線上金融行業嘅領頭羊，螞蟻金服主攻小額線上金融，陸金所主攻中大額線上金融，陣容鼎盛到如斯程度，將令「地產寶」成為最炙手可熱嘅同類互聯網金融產品。
綠地香港嘅好處係控股股東乃綠地集團，有強大背景撐腰，加上沾手阿里概念，每逢港股升市或反彈，點都唔會少得佢哋一份。
睇圖嘅話，綠地香港連續五個交易日低位出現陽燭或錘頭，短線見底反彈機會大，以佢單日波幅有潛力擴大到一成以上咁計，股價要反彈到7月8日後高位5.72元，難度唔算高，現價買，跌穿4元先止蝕。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文