金融High Tea 2015年8月11日
揀實力板塊候低吸
2015年08月11日
股市悶局一輪後，開始有啲變化，內地A股在阿爺用政策救市下，大幅上升4.9%，港股繼續孱仔本色，無力跟上，不過睇真啲，都見到紅色股份開始有番啲生氣，個別股份仲借住重組概念彈上，力度相當唔錯。
今個星
期內地股市開局唔錯，由於中遠洋、中海運成立改革領導小組，開展重組合併大計，系內公司全線停牌，引起市場憧憬將出現「中國神運」公司，將繼「神車」之後出台，帶動國企改革再次成為大市焦點。
加強三大政策招托市
上星期話中證金或動用兩萬億元人民幣托市，內地股市都無升得咁有力，一話重組，即刻刺激上證指數大升，A股高開逾1%後一直攀升，向上突破20天線，先後升穿3800及3900兩大關，曾高見3943點，臨近尾市升勢略回順，上證綜指收市仍報3928點，升4.9%。有分析認為，上證指數繼上周五升逾2%後，再以一枝大陽燭突破20天線，加上有成交量擴大配合，滬深兩市全日成交金額重返萬億至1.2萬億元，反映投資者看好後市。
內地股市咁有力，港股明顯跟唔上，國企指數只係微升0.6%，恒生指數仲要跌31點，跌幅0.1%，表面睇相當唔開胃。但係睇真啲，國企指數唔係點升，主要係內銀和三桶油幾類大股垂頭喪氣，好似隔夜油炸鬼，無厘火氣兼且倒跌，拖住國企指數。但不少股份炒緊重組，中隻小小股份如哈電(1133) 升15.6%，中國糧油(606) 升14.7%，個別內證股都有殺上，個市唔似之前咁無晒焦點，成交略升到810億，開始有人買番啲嘢。
內地經濟差，通脹升，股市弱，不能托市托一世，阿爺能出的招數有限，放水也不敢亂放，怕激起通脹，唯有出政策招，未來國企重組、加快內地基建投資、向外推一帶一路，這三大招將在下半年快速上馬。國企重組先出台，促使大市殺上。
受惠內地股市急升，南方A50(2822) 升3.2%，安碩滬深300(2846) 升4.1%，但指數ETF的升幅，比起炒作具企重組概念的幾系股票就算小兒科啦，中糧系大幅炒上，中國食品(506) 飆12.4%，報4.16元；中糧控股(606) 勁升15%，報3.9元；大悅城地產(207) 升15%，報1.59元；升幅最奀的中糧包裝(906) 都有7%進帳。
其他有國企重組概念題材股紛紛炒起。早前盛傳中鐵(390) 及中鐵建(1186) 合併，兩隻股雙雙逆市走高，中鐵收報8.01元，升6.2%，升幅是國企指數成份股最勁；中鐵建漲5.6%，報12.1元；中材股份(1893) 抽高11%；洛陽玻璃(1108) A股升停，H股爆升24%，收6.29元；哈爾濱電氣(1133) 急升15.6%，報5.25元；中冶(1618) 抽高13%，報3.1元，升幅全部都好誇張。
港股底氣未足無謂高追
我睇本地短期大市，可能都仲係受制於美國加息，同外資對中國股市信心不足，好難狂牛式爆升。如果見個市上得急，高追就要留神。中央準備加強喺政策上落功夫，睇嚟個市開始會定番啲，幾個板塊炒作可以留意吓，好似軍工、交通建設呢類股份，本質都幾強，又無重組股炒得咁勁，可以等佢哋回吐時先至買進。
另外互聯網大事，要數阿里巴巴宣佈以283.4億元人民幣，投資蘇寧電器的蘇寧雲商集團，並由此持有蘇寧雲商19.99%股份，阿里和蘇寧將全面打通電商、物流、售後服務、行銷、大資料等線上線下的體系。
蘇寧是內地第一大家電分銷商，國美(493) 是較細的老二。如今阿里拍住蘇寧搞「互聯網+」合作，恐怕在家電領域有頗大衝擊，對國美當然唔係好消息。而7月股災後，互聯網巨企繼續斥巨資搞嘢，將可重新提振市場對科網股的信心。
陸羽仁
金融High Tea 舊文