異動空間：欲擒先縱未彈完
恒指二萬二似乎牢不可破，半個月三次衝穿都隊番轉頭，截至前日，22200至22500點已累積9億份熊仔街貨，相當於1,600張對沖期指，大戶理論上唔會放生，點都劏咗先，欲擒先縱是大戶慣用手法，只要短期不爆黑天鵝打亂部署，呢批熊仔料將一網成擒。
有此樂觀預期因美
國9月唔加息，上周就業數據又遜預期，加上聯儲局暗示，加息要「等埋大陸」經濟回穩，用盡各種藉口去拖，令市場對年底前加息的預期急降，高盛更揚言隨時要到明年下半年，為股市反彈締造良好條件。另一邊廂，大部份基金今年表現差強人意，如果第四季仍是一片死寂，表現費將凍過水，只要大環境平穩，基金應會落場盡力追回報，畢竟很多人仍要靠股市維生。
炒股先有觀點、再訂策略，既然睇反彈未完，就要對持貨有啲信心，毋須跌兩三格就雞咁腳止蝕，最好能容忍10%左右的賬面損失，心理壓力太大就降低注碼。蓄勢反彈的股份可吼晨訊科技（2000），半年盈利顯著回勇，賺1,647萬，年增2.3倍。走勢上以圓底逐步反彈，10日線將升穿50日線，貨疏較易炒作，短線先睇5毫大位。
魏力
http://www.facebook.com/2012jason
魏力
異動空間 - 魏力 舊文