魚樂無窮：新晉殼王影子股
■港股市況欠佳，戰友只宜小注入場保持觸覺。 資料圖片
港股五連跌，成交逐步萎縮，戰友大歎搵食艱難。無他，炒風明顯側埋一邊，押中可以好和味，好似影業股咁，翻炒再翻炒，早前推介嘅半新股IMAX中國（1970），終於突破50蚊，敢高追嘅戰友，可以開餐了。買錯邊呢
？輸錢變成例行公事，就算唔上唔落，意志都好快會磨蝕，如此市況，只能小注入場保持觸覺。
炒作題材買少見少，唯有喺通告尋寶。實力建業（519）原主席兼大股東洪建生，7月時將所持26.77%股權悉售，每股作價0.58元，接貨者王敬渝大有來頭，佢係新晉殼王孫粗洪嘅外甥女，曾經喺孫粗洪打骰嘅瀛晟娛樂（209）做過執董。孫粗洪有幾巴閉，相信大家都好清楚，今年代表作，非細價股王百靈達（2326）莫屬。年初由2.9仙起步，去到6月高見3.2元，升幅達109倍！量化一下，即係一萬蚊本最終變成110萬元！王敬渝如果學到一成功夫，已經不得了。
王敬渝接掌實力建業之時，中港股市剛開始跌浪，股價難免受拖累，投資價值卻因此浮現︰最新報0.35元，較王敬渝成本價平四成，市值剛好6億元，僅及殼價門檻；日前宣佈出售英屬維爾京群島及巴拿馬度假村項目，套現2.5億元，交易後只餘下小量香港投資物業及債券，似為日後變身做好準備，一旦突破橫行區頂部0.4元，派對便正式開始！
唐牛
https://www.facebook.com/tongcow88
唐牛
魚樂無窮 - 唐牛 舊文