金融High Tea 2015年11月24日
逆市奇葩
2015年11月24日
今個星期期指就會結算，隨之踏入十二月。由於聯儲局官員先後放風，美國有可能加息，美息美匯向上，繼續成為左右大市的力量，就算美股上星期高收，但港股開市已經乏力。強美元效應短期繼續值得關注。
商品關連投資續捱價
聯儲局官員最近有啲彈弓口，會後報告表示認同加息的官員
佔大多數，但同時數據出來參差，特別係通脹前景偏弱，為官方押後加息提供理由，所以美股上星期連續幾日踩上。不過，歐央行行長吉拉德不斷暗示放水，令歐羅匯價持續受壓，美元繼續強勢，所以金價無乜運行，石油股同樣受壓。喺金礦股捱沽下，紫金(2899) 、江銅(358) 都跌逾2%，中鋁(2600) 、中煤(1898) 、中石化(386) 都受壓，中石油(857) 雖然有消息賣產，股價都只能微升，呢啲都係強美元下，商品無運行造成的效應。
美元強勢有可能在十二月份息口去向明確前維持，所以相關股份有可能會再出現一輪拋售。呢類商品關連股份以至澳元、加元呢啲商品貨幣，呢兩年都跌得好慘，如果高位揸咗貨，依家有啲唔上落，唯有捱價死頂落去。中資石油股最大好處係佢有息派，咁做可以幫補少少。但係，如果想溝貨，估計未來仲有機會再平啲，依家最好就先忍手。
由於美息因素，市場觀望氣氛好濃厚。開市無耐，恒指就挫過百點，午後受內地股市下跌影響下，恒指一度挫135點，低見22619點，直至尾市稍為反彈，恒生指數收報22665點，跌88點；國企指數收報10229點，跌72點%，成交只有623億元，顯示沽壓都唔算好大。
近日零售業吹淡風，做潮服同手袋嘅包浩斯(483) 公佈截至9月止中期業績，盈轉虧蝕2661萬元，每股虧損7.2仙，去年同期賺2086萬元。期內收入跌8%至5.85億元，公司不派中期股息。
喺本地中型零售商中，包浩斯其實做得唔錯，佢年前開發手袋品牌SALAD，走中價路線，頗受年輕一族歡迎，成為集團增長引擎，管理層決定大搞，但撞着租金上升及中港消費市場由高位回落，結果之前賺錢，依家變成蝕本，有點生不逢時的無奈。由於集團仲有貴租約未完，相信逆境無咁快過去。
同係做零售，利福國際(1212) 昨日逆升3%，收報12.12元。利福屬下的崇光早前搞減價日，結果人流逼到爆。聽聞今年市道雖然麻麻，但減價日生意都做到去年水平，可以話係逆市奇葩。
嚴格來說，崇光最煞食係有自己物業，可以揀最好的租客入場，而且做生意焦點除了高檔客，都好着重大眾化市場，所以無受豪客減少來港消費衝擊咁大。本地做零售好景時俾業主加租，逆境時又要捱生意唔夠，賺的都是辛苦錢，長遠而言點都無做收租佬咁好，所以解釋了點解好多做零售生意者，一有機會就寧願買舖位。
南早小股東等賣盤
停牌的南早集團(583) 又有消息，彭博引述消息報道，指阿里巴巴集團主席馬雲，洽購《南華早報》股權談判已到成熟階段，簽約儀式快將公佈 不過未有披露財務詳情。南早及阿里巴巴均拒就事件作出回應。
行業觀察人士表示，阿里巴巴自從今年6月以來已經向媒體行業投資數十億美元，包括收購網絡視頻巨頭合一。有人話如果成事，美國就有阿馬遜主席貝索斯買《華盛頓郵報》，中國就有馬雲買《南華早報》，不過，貝索斯係美國人買美國報紙，馬雲係內地人買香港報紙，情況稍有不同。從南早集團小股東來說，最緊要係交易是否可以搞掂，以及公司幾時可以復牌囉。
陸羽仁
金融High Tea 舊文