中環在線：華置新盤旺銷 又勁袋股息
大劉豐收過聖誕
■劉鑾雄今次咁多進賬，使錢一定更疏爽。 設計圖片
■璈珀位於西半山，每個單位身價億億聲。 踏入12月，華置（127）大股東劉鑾雄（大劉）認真豬籠入水，公司早幾日先至宣佈派發特別股息
，大劉可袋逾28億元，再嚟公司最近開售西半山豪宅新盤，差唔多日日有成交，至今賣出9間，公司套現12億元，咁多錢回籠，大劉肯定過一個快樂聖誕喇。
雖然話家陣樓市麻麻哋，但豪宅市場好似未受到影響。華置上星期先開始賣嘅西半山豪宅幹德道55號璈珀，唔經唔覺已經賣咗9間，而且單單巨額大刁，賣出最平嗰個單位都要9,300萬元，全部單位加埋，華置有12億元進賬。
就講噚日賣出嘅3個單位入面，有個12至15樓A室頂層連天台複式樓王，成交價要3.6億元。呢個單位實用面積有成4,710方呎咁大，接近4,000方呎嘅天台上面，仲有個10米長嘅私人泳池，除開呎價7.7萬元，破曬項目成交金額與呎價紀錄。
傳四太睇完樓無買
呢個單位咁豪，市場就傳出，話買家係賭王四太梁安琪，不過據聞四太只係睇過個盤，冇買到。至於同樣喺噚日賣出嘅中層兩個相連單位，聽聞係一個做金融嘅中港商人買入自用，兩個單位加埋超過2億元。
新項目逆市賣得咁好，大劉自然飲得杯落，加埋華置早前以過百億元，將灣仔美國萬通大廈賣咗畀恒大地產（3333），公司日前宣佈等交易完成之後，每股派2元特別股息。按照大劉持股量計算，可以袋超過28億元。大劉應該可以買多好多粒巨鑽了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com