炒消息
2016/02/26 08:57:27
網誌分類: 經濟
其他股市好哋哋，內地股市股昨日忽然一災，上證綜指勁插6.4%，認真嚇人，亦累到港股恆指跌超過300點，國指跌2.4%。歐美股市就照升如儀。
歐洲股市週三大跌後，昨日顯著反彈2%，其中德國股市升1.8
%及法國股市升2.2%；美股仲勁，杜指連續兩日升超過3位數，昨日再升212點至16697點，升幅1.3%；標普500指數升22點，收報1952點，升幅1.1%；納指升40點至4582點，升幅0.9%。股票恐懼指標VIX指數昨日再跌7.8%至19.11，投資者對於後市的信心都好樂觀，同中港市場氣氛大異奇趣。
美股走勢近期都睇唔到有乜新料，都係跟著油價走，紐約3月期油昨日由朝早的每桶32美元下滑至31美元，杜指亦跌至全日最低的16470點，跌15點。其後委內瑞拉石油部長Del Pinos話沙特、俄羅斯、卡達和委內瑞拉同意將在3月中旬召開一次「廣泛的會議」，油價即時勁彈6%至334美元樓上，收市倒升近3%，杜指亦由升轉跌，一路向上。
星期二，沙特石油部長斬釘切鐵咁話唔會減產，所以3月的產油國會議，相信都係講凍產，減產機會唔大。油價只是隨消息炒上炒落。
不過，有商品分析員指出，油價持續低企，賴以產油為生的好多國家，經濟非常大鑊，除咗比較有錢的科威特，仲可能挨得過難關，比較窮的國家，例如利比亞（伊斯蘭國的發跡地），油價再跌，將導致饑餓同內戰，據國基會（IMF）估計，石油要賣到每桶269美元，利比亞的預算至能夠平衡，可想而知，情況有幾咁惡劣！
至於全球最大產油國沙特，經濟狀況介乎最有錢和最窮之間，情況比較穩定，因為經濟有比較可觀的儲備資產支撐，至去年12月，有6240億美元儲備，不過，國家之所以仲算穩定，全靠國家派錢買職位同大幅加大公共開支，但在政治淩駕經濟的前提下，壓住油價，導致國家收入大減，開始要食老本兼勒緊肚皮，早前沙特已經削減國家來年的預算，亦在考慮出售國營石油公司Aramco的股份。有分析已經警告，沙特可能最早在2018年就會面臨經濟破產。
市場依家預測2016年全球石油比較實際的需求是每日增加100萬桶(按年計)，而石油產量目前係每日卻是增加150萬至200萬桶，供應增加仍遠遠大過需求增長，所以供求失衡情況仍會持續，所以，短期內油價仍然唔樂觀。
不過，隨著油價跌到大約30美元，美國好多產油公司已經頂唔住，有數字顯示，美國活躍油井的數量已經大減70%，估計今年會每日減產100萬桶，剛好抵消咗伊朗下半年的每日100萬桶的產量，所以，市場預計今年下半年油價會造番好啲，比較樂觀的估計係回升至50至60美元。油價好啲，股市又會好啲。但記住這是下半年的預測，上半年還有反覆。所以想買油股，還是等佢地下插時分段低吸好啲。
陸羽仁
回應(1) 我想回應
陸羽仁 BLOG 舊文
來源 source: http://blogcity.me