A股弱底 無端一棍
2016年02月26日
玄學家話，香港猴年金火交攻，尤其年頭最惡頂，唔知係咪咁樣，所以港股俾內地同美國股市交攻，恒指上個星期反彈，以為佢可能會彈得耐啲，點知外圍跌完，昨日輪到內地股市勁插6.4%，搞到恒指又碌番去萬九關口樓下，跌1.6%算係跌得少啦。
金融券商股無運行
全球股市家受三個大因素影響，美息、油價同內地經濟，三者又互相牽引，踏入二零一六年，三大因素輪流衝擊，搞到股市風聲鶴唳。比較起其他市場，香港就特別無力，美國杜指失演一萬七千點高位後，萬六關暫時守得好穩，但港股就反覆向下，恒指插穿萬九點後，爬上去又碌番落嚟，反彈都唔係咁有力。
過去一個星期，美息、油價稍為穩定，預計港股或者仲會彈多陣。點知內地股市咁跌法，港股無情情又俾人插一棍。
A股爆災，主要係話擔心隔夜上海同業拆息急升，國債逆回購利率一度爆升上8.5厘，反映內地資金偏緊，金融同券商股無運行。上證指數連穿2900和2800點大關，收報2741點，下跌187點或6.4%；深成指收報9551點，跌756點或7.3%，本地掛牌的A股ETF難逃拋售。安碩A50(2823) 收8.75元，挫4.1%；南方A50(2822) 降4.3%，造10.2元。其實內地借拆息升，唔係真係咁大件事，插到6.4%咁勁，理據有少少含糊講唔清，只能夠話要死唔使病啦。
受A股拖累，恒指收報18888點，跌303點；國企指數收報7871點，下滑189點，以1.8%跌幅，相對內地已算跌得少，成交637億元。除咗中資股下挫，匯控(005) 收跌近2%，收報47.75元，再逼近年低位。
藍籌輪到友邦保險(1299) 公佈去年全年度業績。呢隻舊年的常升股王盈利26.91億美元，按年跌22%，遜預期，每股盈利22美仙，派末期息每股51港仙，大幅提升50%。全年派息69.72港仙，按年增加39%。友邦呢招盈利跌、派息增似曾相識，唔多唔少有護價味道。
友邦都要息誘護價
友邦保險集團首席執行官兼總裁杜嘉祺(Mark Tucker)解釋點解派高息時話，咁做係想反映集團透過投放資本於回報率吸引的高質素新業務，同時提升資本效率，從而締造強勁盈利性增長策略的持續成功。這亦顯示對友邦保險未來增長前景充滿極大信心。本來友邦係隻增長股，股東唔會期望股息增長咁強勁，尤其係利潤錄得跌幅之下，但無論點都好，無人會嫌錢腥，公司肯派息，對股東點都唔壞。
友邦盈利遜於預期，同投資市場風急浪大好大關係，佢投資回報44.6億美元，按年顯著下跌45%。前年喺股市收益5.08億美元，去年卻錄得股市虧損3.7億美元，連同其他負面非營運項目1.48億元的負面影響，食晒稅後營運溢利的增長。不過，實質匯率計，去年新業務價值增長19%，年化新保費增長8%。內涵價值營運溢利50.68億美元，按年升12%。
對於友邦業績，摩根大通發表報告，指友邦去年純利按年跌22%至27億美元，比摩通預期的33億美元利潤低，因受亞洲股票市場波動影響，但就話集團派息有驚喜，全年股息升50%。睇番去年按市場劃分，友邦中國新業務價值增長42%，香港及新加坡新業務價值分別增長32%及14%。南韓則表現最差，按年下跌44%。由於中國係佢主要引擎，所以去年第四季起內地放緩浮面，對追捧友邦的熱情都有啲影響。
陸羽仁
金融High Tea 舊文
來源 source: http://hdfin.stheadline.com