中環迷你裙：戰勝股場洗衣機
■近期股滙債發上發落，若持股票重倉，隨時隔夜飯都嘔埋出來。 資料圖片
環球股市開局每天「哈囉喂」，股民日日都要幫襯鬼屋，今個星期冇事，唔代表下星期都冇事，每次驚嚇都夠創意，先有熔斷機制、再來德銀債務危機，近排連英國脫歐呢隻「黑天鵝」都出埋來，
膽小的早就衝出逃生門一去不復返。
捱得過鬼屋的考驗，股民又要面對「洗衣機」的折磨，股滙債發上發落，若持股票重倉，隨時隔夜飯都嘔埋出來，食少啲野（低持倉），雖然唔舒服，但起碼相安無事。
黑暗過後又係咪晨曦呢？遺憾地，德銀CDS又在靜悄悄地往上爬，美國和德國國債孳息率再展跌浪，後者最誇張，本年至今其孶息率跌了75%。A股昨突然大跌6%，內媒話九大利空殺跌，睇嚟都係唔知發生咩事。唉，又要焗清持倉，剩下隻公用股和黃金ETF，休戰暫做塘邊鶴了。
市況差，畀個勵志個案給大家，上海對沖基金景林資產管理的創辦人蔣錦志成為全球50大最佳對沖基金之一，蔣氏指，市場重挫時景林密切關注但從來沒有恐慌過，股市通常不時會升跌過多，希望利用市場犯錯的機會謀利。
大笨象份成績表成地眼鏡碎，滙控（005）佔恒指比重大，料一眾藍籌業績期後，恒指估值會出現明顯調整。
Samantha
https://www.facebook.com/stocksamantha
本欄逢周五刊出
Samantha
中環迷你裙 - Samantha 舊文
來源 source: http://hk.apple.nextmedia.com