金手指 - 孫柏文 2016年4月12日
金手指：
談炒樓的貢獻
■馮永業同佢老婆馮程淑儀（圖），近日facebook婚姻狀態有改動。 資料圖片
相信呢排大家facebook都不斷有朋友分享一單高官同賭王姨仔樓換樓嘅新聞。因近幾日兩位事主，馮永業同老婆民政事務局常任秘書長馮程淑儀，啲facebook婚姻狀態有改動，令花生價格日日升停板。
好多報道都含沙射影話：「馮氏夫婦坐擁億元資產，憑佢哋公務員背景，如果唔係賄賂，點可能呀？」呢啲撰稿員，我深信一定冇睇財經版。點解？馮氏夫婦兩人都約50歲，即二十出頭開始有收入的話，就係80年代尾。即係食中香港最神奇嘅兩個樓市大升浪。炒開樓嘅人要大發特發，除咗要生得逢時外，當然要借到錢做槓桿。以佢哋兩個公務員般穩定收入嘅背景，仲要係聰明、星途無限，如果掌握時機準，狼死借盡，就可擁億元資產。
有井底蛙記者話公務員擁億元資產「罕見」，只反映佢哋不但冇睇財經版，連港聞版都冇睇。因勞工及福利局局長張建宗，如唔係近乎摸頂放貨，佢要申報嘅樓都應該近億元。如果搞泳池、公園嘅民政事務局常秘都懷疑被賄，派福利嘅張局長都應該有嫌疑！
月入幾十萬元，當資產大，如再大幅槓桿，份糧都冇大幫助。喺收入無助借錢嘅情況下，大家真係要多謝馮氏夫婦、張局長等公務員，佢哋近乎做緊義工，真心想為香港啲公園、老人福利、機場未來出謀獻策。香港公務員團隊，有如當年甘迺迪內閣般金光閃閃、熱心社會！
再講，佢哋被記者們圍剿另一原因，係犯咗「炒樓」呢個原罪。不過大家知唔知炒家對社會嘅貢獻呢？佢哋為市場提供大量流通量。你要沽樓，就算係特色單位都有人接，而你要買樓，就多啲唔同特質嘅選擇。𠵱家炒家絕跡，成交量大跌，結果就係大把人住錯樓，唔係因冇心儀特色戶搬唔到，就係嗰區冇啱嘅盤。
你住公屋，一世冇得搬係唔明。不過炒家對社會貢獻就係咁，唔明，就好啱做港聞。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com