收市閒情：我在跌市之中找到快樂
■大約一年前呢個時間，大時代啟動！ 資料圖片
我係James，喺2016年的4月5號，有個女人同我講咗一聲「生日快樂」。你以為我會好王家衛咁，因為呢一句話，記住呢個女人？世上邊有咁浪漫嘅事？如果真係有，一年前嘅大時代，早就令我印印腳，唔使再喺呢間所謂嘅
化妝品店做男sale屎。不過，正正因為現實殘酷，所以先令我今年有真正的快樂。
大約一年前呢個時間，大時代啟動！我日日炒股，是但買乜股都中，買到樂極忘形。結果係點，當然係樂極生悲。當日高峯贏八成，家陣呢？倒輸是常識吧。
不過，今日大市冇眼睇，我反而自得其樂，我唔需要每日俾一堆數字影響我心情；更加唔需要走去將《人民日報》當大行報告，企圖搵買股啟示，因為我真係睇唔慣。我一直都唔明，點解大陸嘅文章，係唔係都加個「性」字，真係有咁大需求？「供給側結構性改革的推進」、「長期累積的結構性和制度性矛盾」，隻隻字都睇得明，黐埋一齊就唔啱文法，或者呢個本身係中共策略之一，似是而非，龍門任搬。最重要係，自從暴力救市後，我少咗一個煩惱，就係思考中國政策信唔信得過。
正所謂，分手快樂，請我快樂，揮別錯的才能和對的相逢。冇得炒股，我更可以專心去玩LOL了。
輕鬆成為「本土英雄」
講開報紙，報紙佬日日報「零售寒冬」，話上月港零售額跌兩成，商戶喊咁口。冇錯，家陣生意今非昔比，以前啲大陸客，行入嚟講一句「給我一萬元的貨品，甚麼也行，給我十份，我用來送禮」。我口水都唔使多句，咁就做十皮生意，係好爽。
家陣唔同啦，見到有客入嚟都要偷笑啦，不過，我係快樂嘅。好似上個星期，我見到個大陸客想排隊打個香港人尖，我chok行把聲講一句，「不好意思，是後面的小姐先排隊」。咁我就輕輕鬆鬆成為「本土英雄」，喺facebook俾人高度讚揚，實情係家陣啲內地客，消費力唔高，根本唔使畀面佢，我都忍得佢哋耐啦！
話時話，家陣要做英雄好易，為香港人發嚇聲，講嚇心聲就得，講得多，唔使等十年分分鐘獎都有得你囉呀！
獎我就唔恨，因為我最大嘅獎已經得到了。今日，係我第七次向阿怡求婚，然後佢終於say yes。點解今次佢會應承我？因為今次我用份寫咗佢名嘅樓契，連埋隻戒子送畀佢，之後佢仲送多句「生日快樂」畀我。多謝跌市，令我終於有機會入市，500萬買個實呎500幾嘅單位，人人都話抵！不過聽人講，500萬喺外國買到別墅。
呢個時候，電話響起，電話鈴聲係：「你不是真正的快樂……你的笑只是你穿的保護色……」
完
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com