財經評論：樓價貴質素降
■不要天真以為發展商以平價買地，就會同樣平價售樓。 資料圖片
廣東俗語有雲：「留番拜山先講！」前日清明節，唔知市民大眾祭祖時，和仙人講最多是甚麼？有說拜山時講說話百無禁忌，講甚麼都得，會唔會同仙人講幾時買到樓？問嚇先人𠵱家應唔應該入市？同仙人訴苦，目前陽間樓價貴得嚇人，簡
直超出負擔水平，保佑樓價快速下跌，好讓陽間嘅人安居樂業，安寢無憂。
確實，安居樂業何嘗不是大眾嘅願景，在生嘅人固然想改善居住環境。住公屋的，想升級買居屋；居屋住戶想升呢買私樓；住唐樓的，可能想買層有升降機到達家門嘅樓；劏房戶更想跳出不足100呎空間，越住越豪。
現時地產商推銷的豪宅，何嘗不是對應人想改善居住環境，炮製出來嘅理想居所？例如有冷暖水室內外泳池、私家花園、樓底極高嘅複式單位、豪華廚房家電設備、淋浴間及浴缸兼備的浴室、仲有按摩池……對一般打工仔而言，要擁有上述仿如六星級的居所，可能只是夢一場，距離現實嘅路仲好遙遠。
然而，地產商近年經常話建築費貴、人工貴，導致發展成本不菲，想平賣都難，加上發水制度收緊，邊際利潤收窄，計算用料時固然走向經濟實惠路線。
聽聞有些政府加入限制的私人樓宇，不再鼓吹選用豪華用料，反璞歸真，過往標榜大大幅的雲石牆身用料、全雲石大堂、雲石浴室等，可能不復再；加上經濟前景真的不太明朗，豪宅滯銷，發展商會否再如以往標榜選用意大利、德國名牌廚具，落重本提供頂級家具電器建豪宅，也成疑問。
而收緊發水限制後，發展商可獲豁免計算入總樓面面積的百分比縮窄，新建私樓難再提供巨型住客會所等設施供住戶使用。不要天真的以為用料回歸簡樸，發展商會將價就貨。請別癡心妄想，實情是，即使地價平買番嚟，也不代表會平價出售，未來新樓可能是用料倒退，卻依舊不便宜出售。
記者：湯家明
財經評論 舊文
來源 source: http://hk.apple.nextmedia.com