中環在線：一帶一路合奏
黃國英寸「唱K」
■黃國英
梁振英有幾熱愛一帶一路大家有眼見，近日就連獎學基金都謀硬闖財委會，不過投資界似乎好冷淡嘞。股民熟識嘅基金經理、豐盛金融資產管理董事黃國英（Alex）前晚喺灣仔伊館搞talk show，當晚除咗大派股票貼士，仲力數港府合奏「一帶一路
」只係「唱K」，根本無錢搵，反而話識得廣東話俗語先係投資必殺技，諗法好「本土」。
2,000人噓爆李小加
港股無乜鑊氣，近排唔少金融免費講座都冷冷清清，好難得Alex嘅收費talk show仍然有近九成滿座。佢話喺內地人心目中，香港係一帶一路嘅關鍵角色係集資中心，即係要香港做「交數中心」，港府又好專注兼配合，但問題係政策好難穿越周期，睇唔到乜投資機會，與其跟政府「唱K」，不如將目光放喺已經取代地產霸權嘅科技霸權。
Alex喺2011年成立對沖基金，截至4月底累計賬面回報近三成，連派息約五成。佢傳授短線捉股市大轉角的心得，係要記住「鑊鑊新鮮鑊鑊甘」呢句廣東話俗話大智慧，形容壞消息「唔新鮮就唔甘」，當市場出現未見過嘅驚嚇場面就要走人。另外，Alex話港股舊年主板輸一萬億，股民佔3,000億，相比下「港珠澳及三跑都係濕濕碎」，所以當晚一開波就話要同港交所行政總裁李小加算賬，要大家一齊噓爆佢，結果全場近2,000人都好配合。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com