智取大市：幾時係沽貨時機
■當大市亢奮到炒過籠，連唔應該升嘅板塊都升埋，就係出貨嘅時候。 資料圖片
早兩日同戰友傾開，都不能否認呢轉短線升浪嘅特性，就係升嘅範圍好窄，強勢股基本只有地產股、REITs、騰訊（700）、煤炭股、貴金屬股，如果同時手揸幾隻唔同行業股，有機會近日拉勻只係打和
，揀得差啲甚至升市輸錢，呢個情況喺美股市場亦係常態。
要解釋原因，先要睇番近期升市主題，就係全球放水憧憬，直接受惠嘅有貴金屬價、資源價格、物業價格，相關股份近期就升得起。至於科網、電子設備股，純粹因為幻想空間長期存在，又長期交到數，咪能夠長期保持強勢，同放水無關。其餘板塊？冇啦。
股市近期反彈嘅各種因素，係投資者睇太淡、估值又低、壞消息又出盡、適逢放水消息有驚喜，但係升股範圍窄到咁，證明咗，聰明錢認為即使全球放水，都唔會對經濟有絲毫幫助，對企業盈利亦唔會有任何好處，所以升勢難以傳導去經濟周期相關股份。
假如相信聰明錢是對的，就等如認為放水幾乎完全冇用，咁中長線環球前景唔慌好得去邊。如果下一刻市場亢奮番啲，升市傳導去其他板塊，到時就已經係炒過籠，因為連唔應該升嘅，都升埋，到時係出貨嘅時候。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com