中環在線：周大福後人搞沉香首飾
■周樹堂與兒子創立品牌，將沉香首飾換新裝（右圖）。 
今時今日講起周大福（1929）珠寶金行，大家只會記起創辦人周至元嘅女婿鄭裕彤，好少提到周至元嘅下一代，原來佢次子周樹堂多年來經營「福榮堂」，專
賣翡翠玉石，佢最近更同兒子周康維創立「香津沉香」新品牌，希望將傳統沉香首飾換新裝，打入年輕消費市場。
收藏級貴過層樓
周樹堂年逾60，移居美加廿多年，1990年回港發展，2009年與胞弟周樹榮成立福榮堂，上周五慶祝業務擴張，力推沉香產品。受真菌感染嘅沉香會散發自然香味，有價有市，甚至被歸類為古董同藝術品，收藏級嘅分分鐘貴過樓。
周樹堂坦言，爸爸嗰代已經收藏沉香，𠵱家希望將產品年輕化，「用少啲沉香，加啲銀、石，以前要幾萬蚊以上，𠵱家幾千蚊就有，好似買個LV咁嘅價錢，好適合年輕女士」。
根據福榮堂網頁，沉香首飾嘅價錢由300元至7萬元不等，最多係幾千蚊嘅款式，設計簡單平實，沉香主要來自老撾、印尼同越南。
周樹堂嘅下一代亦有加入幫手，長子周康維𠵱家加拿大同香港兩邊走，主要幫爸爸處理沉香生意，負責加拿大嗰邊嘅電子商貿。細仔周康渝比較怕醜，佢話剛喺重慶大學畢業，想去出面闖嚇先。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com