笑到最後：學比卡超推QE GO
■傳統量寬行唔通，可以學《Pokémon GO》推個「QE GO」，透過將資金周街俾人「捕獲」提升貨幣供應。 資料圖片
《Pokémon GO》係一項發明多過純遊戲，定位加捕獲功能，應用不只限於遊戲，應可應用喺政策層面，例如量化寬鬆（QE）。
聯儲局前
主席伯南克未做主席前講過，對抗通縮會搵架直升機掟啲錢落街，但佢任內三次量寬，冇一次係喺天空掟啲錢落街。直至《Pokémon GO》嘅發明，解決咗直升機掟錢嘅技術問題，一旦推出可以改稱「QE GO」。
傳統QE經銀行發放信貸，銀行係越有錢人借得越多，而有錢人借錢唔係用嚟消費，係用嚟再投資，重置投資令資產價格上升。市場上資金太充裕，逐漸對收益要求下降，對比以前，今日嘅收息股冇乜息口，跑贏銀行存款就算數。
QE效用喺資產市場大於經濟，美國勉強有能力透過財富效應刺激經濟，繼而首先喺金融海嘯後加息。不過英國脫歐加上其他國家經濟差，全世界都QE，又令美國冇條件再加息。
傳統QE若果失敗，都好彩有人發明咗《Pokémon GO》，如果央行夠大膽，必要時推「QE GO」，透過將資金周街俾人「捕獲」，去提升貨幣供應。
「QE GO」取代傳統嘅好處係：一、人人有份玩，資金唔會受銀行篩選而傾斜去有錢人，投資重置機會較細；二、意外之財，短線消費肯定會刺激到，至於長線，其實傳統QE都維持唔到刺激作用，美國先至要推三輪QE；三、較直升機掟錢公平，以美國為例，掟嘅一刻分分鐘會開槍見血，但玩《Pokémon GO》時，有人深夜出街捉精靈，俾警察逗，最後感化到警察一齊玩，促進社會和諧。
全球經濟現況唔差，但前景極差，都係QE造成。避險嘅金銀竟然同風險資產股票一齊升，即係市場用資金去投下不信任貨幣嘅一票。高明唔相信有任何一個政府敢大手加息破壞現狀，走投無路必定會派錢。用《Pokémon GO》去派錢，係個具爭議得嚟、大家都接受到嘅方法。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com