智取大市：跌市冇人係強者
■跌市的時候大部份投資者都會變成弱者，淡友亦不例外。 資料圖片
要檢討近兩三個月測市同買賣策略嘅話，自己做得最啱就係恒指2萬點樓下一直保持睇好後市，做得最錯就係升到22000點就轉趨保守，令22000點至23000點呢段搵食高峯期裏面，未竟全功。
當然，升市
途中，大部份投資者都會變強，至於跌市，就大部份投資者變成弱者。你以為淡友喺跌市之中就係強者？情況絕非這樣，因為淡友好多時喺升市時已經輸到重傷，去到真正跌市之時，能動用嘅彈藥所餘無幾，又何來喺跌市有攻擊力？
恒指之前連續4日出現陰燭，加上近兩個幾星期，升股數目逐漸減少，由8月8號嘅近千股齊升，去到噚日（星期一）只得500隻左右向上，此消彼長之下，跌股數目逐步增加，顯示市況正在走弱途中。調整浪似係初期，就唔會立亂去估跌多定跌少，因為估跌得少而硬食調整，但最後結果係跌得多嘅話，後果可大可小。
調整浪初期，就等如啱啱進入一條冇燈嘅隧道，剛剛入去嘅時候，你仲感覺到光猛，慢慢會越嚟越暗，最暗嘅時候有幾暗？暗幾耐？好難由一入隧道嗰嚇就能夠洞悉到，所以都係等入曬呢條隧道時，先盡快去捕捉出隧道嗰一點光。呢一刻，似乎係剛剛進入隧道嗰一瞬間，所以都係持有較多現金等運到。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com