煤氣增長慢 送紅股無用
2016年08月24日
周五美國聯儲局主席耶倫會出嚟講嘢，喺佢開金口之前，市場觀望氣氛濃厚。儲局官員近日出來扮吓鷹，暗示今年有機會加息，中環茶友話，美元偏軟，唔知儲局係唔係扮鷹挺美元，股市呢幾日借觀望利率唞唞，且看接近周末會否回氣再上。
呢排美息企硬嘅訊息
增加，儲局前主席格林斯潘出嚟唱淡，話美國可能出現滯脹；副主席費希爾日前又出口術，暗示美國息口有調高機會，有聯儲局通訊社之稱的《華爾街日報》記者Jon Hilsenrath又話儲局已預備難以回復正常利息的「新現實」，美國今年加息幅度唔會大。係消息支撐下，美元匯價再上，睇嚟儲局已經開始展開脫歐後嘅加息鋪排，令市場適應息口將會溫和上調。由於耶倫本周在的Jackson Hole央行年會嘅發言等如開牌，將成為焦點。
中車跌左都唔算平
大市在觀望中無乜搞作，昨日偏軟，到U盤時始拗腰回升，成交奀奀，僅608億元。恒指收報22998點，升1點；國指收報9586，跌15點。安徽海螺(914) 中期純利雖然跌28.8%，但仍獲瑞信升目標價，股價升3.8%至21.9元，為升幅最大的國企指數成份股。中國建材集團與中國中材集團公司實施重組，旗下中國建材(3323) 升0.52%。
中車(1766) 半年業績僅多賺2%，股價昨報6.93元，挫4.15%，為包尾的藍籌股；旗下中車時代電氣(3898) 同時捱沽，收報40.1元，跌8.9%。中車在去年政策牛市時，挾着走出去概念大炒，去年4月炒上20元高位，但後來中國走出去畀美日等先進國家四處包抄，中車變慢車，股價由高位插左65%，至今反彈乏力。喺佢市價最高峰時，市值大過波音，明顯係炒過龍，所以現時唔係佢股價低，只係當時股價高，泡沫爆裂後相信股價有排醫。
煤氣(003) 雖然有紅股送，今年仍然跑輸大市，更加追唔上其他公用股。集團日前宣佈業績揭開謎底，上半年盈利微增3%至43.3億元，維持派中期息每股12仙。本來，咁成熟嘅業務盈利增長3%唔可以話好差，要留意嘅係今年上半年本地天氣嚴寒，凍到差啲結冰，市民用熱水大增，有利煤氣股價，管理層都話今年上半年由於氣溫比正常低了近1度，香港居民用氣量上升，飲食業用氣情況也良好，令期內售氣量上升了1.8%。喺咁有利環境下增長咁少，就值得提高警覺。
煤氣乏力有幾個原因，第一是市盈率25.6倍已經好高。第二係中國業務轉差，去年至今人民幣匯率跌了4.8%，扺銷了中國業務5%增幅，兼且由香港借貸匯入中國的資金也有2.3%按市值計算損失。第三係油價低企令新能源業務轉差，公司指出，除了已經上馬的項目之外，暫時停止發展，易高能源的技術則轉為發展化工產品。煤氣曾經想過大力發展新能源，隨著油價下跌，呢瓣暫時就輸錢易過贏錢，所以都係轉軚明智啲。
中國同業估值更平
煤氣公佈業績後，大行都唔係咁睇好，瑞信發表報告表示，煤氣上半年經常性盈利按年增長3%至38億元，大致符合預期，本地及中國業務達到預期，但由於油價低迷，新能源業務仍然受壓。該行認為，相比中國同業市盈率13倍，煤氣市盈率近26倍，估值上有較大溢價，股息回報只有2.4%，較本地公用股平均4%低，評級維持「跑輸大市」。
同樣，大摩認為煤氣新能源業務純利能見度低，加上預期明年市盈率達25.2倍，中國燃氣股平均只得14.1倍，維持煤氣「中性」評級，目標價13.6元；換言之，即係煤氣估值貴，咁高市盈率如果交唔出高增長，送紅股都無用啦。
陸羽仁
金融High Tea 舊文
來源 source: http://hdfin.stheadline.com