收市閒情：
港式頑固 港式慈父
■今時今日，只要你放低首期幫個仔買樓，全世界都爭住叫你做慈父。 資料圖片
台灣五月天新歌《頑固》MV，以超強卡士好似梁家輝、宋芸樺，去包裝一個就算生活是好是壞，都唔忘記原本嗰個充滿夢想嘅自己。官方公佈，呢隻MV就耗資千萬台幣製作，即大約250萬港紙，
結果只係一晚，facebook及YouTube分別已錄160萬次及38萬次觀看次數。單睇咁嘅成績，250萬都算花得值。
理想、夢想呢類講到口臭嘅topic仍然有價有市，原因係一個簡單經濟學概念：稀有性。從來講夢想係好廉價，但真正實踐到嘅係少之又少。香港人唔係唔頑固，有好多事都好執著，特別係買樓。
正所謂「養兒一百歲，長憂九十九」，父母緊張子女就梗啦。要知香港人對買樓有幾執著，你睇嚇當下「慈父」係咩定義就知。
做個實驗，喺新聞搜尋引擎打「慈父」、「上車」兩個關鍵字，搜尋2012年相關新聞，共有11條，有10條都係娛樂版，而「上車」呢個字眼一出現，係真係講緊個人上車，好似有講郭晉安湊囝囝上車，「一副慈父笑容」等。至於講「慈父」幫囝囝買樓上車嘅新聞，只有1單！
至於2013年24條搜尋結果入面，就有4條係講「成功靠父幹」嘅買樓勵志故事；另外主要都係娛樂新聞，當然仲有一條「真慈父」新聞，個阿爸幫個仔啜毒結果染瘋狗症！2014年就少啲，17條搜尋結果，只有1條講買樓上車。
然後2015年26條搜尋結果，有10條講買樓，佔四成；至2016年，17條新聞入面有8條都係講「慈父助上車」，佔比近半！至於啲新盤，更加變成「慈父盤」。
以前要獲傳媒頒發「慈父」呢個牌坊，係講緊要啜毒救個仔！𠵱家要做慈父？只要你放低首期，全世界都爭住叫你做慈父，你個仔？即刻攬住你講，「I love you, Dad」。香港人連「住」呢個基本生活條件都未解決到，你同佢講「實現兒時夢想」，會唔會過份奢侈？用250萬去講理想，佢哋會話：「何不用來畀首期？」
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com