智取大市：今年市況恰死基金
■年初至今恒指升咗約4%，但原來爭取正回報並唔容易。 資料圖片
2016年過咗接近8個月，恒指升咗大約4%，但原來爭取正回報並唔容易。港股近2,000隻股票及ETF當中，年初至今，只有661隻股票上升，剛好佔整體三分之一，命中率絕非恒指變幅可以反映。如果今
年做得多買賣，贏嘅次數要多過輸嘅次數，係非常唔容易嘅事。
至於年初至今升一成或以上嘅股票有433隻，5隻中只得1隻，即係，唔輸已經唔容易，仲要尋找有意義嘅升幅，相當難。
而年初至今，股價由低位曾經升大約1倍嘅二、三線股，其實為數唔算少，瑞聲（2018）、舜宇（2382）、吉利（175）、信利（732）、信義玻璃（868）、天虹紡織（2678）、敏實（425）、建滔孖寶……年初唔容易發覺佢哋厲害之處，及後估佢唔到，越升越有。上述股票走勢有一種特徵，就係大部份呈慢升格局，逐啲逐啲升，趁你唔覺就升夠一倍。
如果你係一個天才散戶，你可以靠上面求其幾隻而贏大鑊，但係呢種市況最恰邊種投資者？答案就係基金，上述贏大鑊股票裏面，有唔少成交深度唔夠，基金想買多少少都唔得。持倉幾十隻股嘅話，就算揀到上述任何幾隻，唔慌買得大，都隨時被其他持倉股份拖死。難怪連惠理集團（806）業績都唔掂。
未來嘅日子？連好股都升曬，騰訊（700）都升到200蚊，想搵有潛在升幅嘅股票，相信難上加難，大市唔跌番去平啲，就冇乜人唔識玩落去咯。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com