中環在線──
網傳阿信屋執笠 林偉駿：純粹惡搞
■林偉駿提到若守唔穩200間分店，可能兵敗如山倒。 資料圖片 
網上噚日流傳759阿信屋執笠，如果係真嘅話，一班忠實OL粉絲可能會齊聲痛哭，大呻以後唔知去邊度掃零食減壓。事關重大，阿
信屋肥老闆林偉駿噚日即刻回覆，否認執笠，指有關消息純粹惡搞！
雖然係惡搞，但係今次實在玩得太過火喇，隨時搞到林老闆相當頭痕，此話何解？睇睇阿信屋母公司CEC國際（0759）上月底公佈嘅業績報告，舊年盈轉虧，蝕2,971萬元之外，截至今年4月底，公司借銀行6.8億元，一年利息支出都有2,266萬元，就算公司唔賺錢，都要還息畀銀行。噚日俾人唱佢執笠，如果有銀行信以為真，驚起上嚟，搵佢call loan，咁林老闆都幾頭痕。
「今年蝕2,000幾萬」
林偉駿澄清話，有關網上文章並非出自新聞網站，「純粹惡搞，唔知出於咩原因，冇必要理會」，佢又指文章引用錯誤數據，「阿信屋今年蝕2,000幾萬，佢入面寫我哋蝕6,000幾萬」。佢鬧爆呢篇網上文章完全係「惡作劇」，只係將佢較早前接受雜誌嘅訪問「改頭換面」。
根據業績報告，阿信屋𠵱家有271間分店，林偉駿喺早前嘅雜誌訪問提到，一定要守穩200至300間分店，如果守唔穩，有機會兵敗如山倒。華華估計背後原因可能係要達到一定規模，佢入貨時先至做到規模效益，不過佢家陣已經做到蝕錢，似乎要諗計變陣先得嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com