金手指：聯儲局將大嗌加息
■耶倫早前大大話美國有條件加息，不過美股照升，因為冇人再信當局嘅說話。 資料圖片
上周五晚，劈頭第一句我話：「各位同學，對不起！我來晚了！」喺邊到咁講？孫柏文有幸受邀到就快要清場嘅數碼電台DBC，做節目嘉賓。
點解我會咁講嘢？原因係啱啱周末發生嘅事，我相信將
會主導2016年餘下時間，所有資產價格嘅走勢，而到節目出街嗰刻，香港已收市，仲唔係來晚了？咁周末發生乜事？當然就係一年一度，花旗國聯儲局Jackson Hole嘅會議。你可能唔知嘅原因，係因冇乜報道，本報都只係禮拜日用咗一段仔講。不過如果你忘記，我就要提你Jackson Hole有幾重要。先有喺2010年用來宣佈「量寬二」，再有舊年開始確實會加息，最後真係12月加。
咁我喺節目話：「聯儲局最大問題唔係加唔加息，而係除非真係做嘢鬱個息率，佢哋現今最大嘅問題係講乜都冇人信。股市、債市、搶住買Yoho乜嘅買家全部都唔信。」所以我話聯儲局將會措詞非常強硬。而耶倫主席亦真係大大聲話絕對有條件加息。
點知佢一講完，美股即升，因冇人信。唯一會令大家信會加一次息，就係聯儲局補飛，即日再派副主席Fischer出來話「今年有條件加兩次息！」雖股市隨即回落，債市有少少反應，但講到話加兩次息都只係咁嘅反應，聯儲局不但大鑊，冇人信，更重要係佢哋都知冇人信佢哋。所以，我信聯儲局將會未來數周不斷大嗌加息。加唔加？唔知。會唔會鬱到個市？唔知。我只知佢哋真係加的話，市場之前係唔會反應，宣佈後先插死你。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com