笑到最後：萬一加息點算好？
■市場普遍預期，今個星期聯儲局唔會加息。 資料圖片
市場大部份人都覺得，今個星期聯儲局議息唔會加息，以30日聯邦基金期貨推測嘅加息機會，88%機會會維持息口不變，得12%會加，可以話幾一面倒。可惜嘅係，美國好興喺一面倒嘅事大熱倒灶，例如特朗普參選，一開始全
世界當佢小醜咁睇，點知過嚇一關又一關，最近民調仲過埋希拉莉，如果當選等於連開十鋪大，而佢又同時買中曬。同理，越多人睇淡9月唔加息，亦都要有心理準備佢會加。
一旦加息，都算係意料之外，亦都會驚聯儲局加息周期加快，有機會先出現一輪恐慌，造就一個絕佳嘅買入機會。
美股相對較以業績推動股價，而非純資金市，加息即係經濟升溫，美國各項就業、經濟指標都好轉，而且美國企業多數都係走國際市場，好似蘋果出部iPhone7乜賣點都冇，一樣照有得炒，就知美國競爭力強，未有新元素篤爆個泡沫之前，加息都只係短線震盪的藉口。
始終香港都睇美股頭，後者估值水漲船高，港股都仲有得跟升，而且兩大升市源頭騰訊（700）同滙控（005）基本上唔受加息影響，滙控仲會受惠息差擴闊，只要加息造低個市，又係買貨時機。
如果真係有不利因素，就係大陸北水割禾青，抬錢走人。自8月起港股通淨吸資500億元人民幣，期間好消息不絕，又深港通、又險資可買港股通，中央好哋哋做咩益你小香港？對中央嚟講，股市係香港僅餘有用嘅功能之一，一年前A股大牛市好多人已講過，中央炒股還債，A股股災後出唔到招，但債唔會冇咗。
今次港股被炒起，亦非無緣無故的愛，A股股災後，中央又出錢、又出消息推高股市都算係第一次。炒高係手段，債轉股先係目的，將負債益你班港股基金散戶。如果炒到呢刻，中央覺得「階段性勝利」，透過IPO、配股抽水，咁呢個升浪就宣佈玩完，比起加息影響更大。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com