智取大市：
勁超買寧願縮注碼
■集優絕對有權食埋下一轉升浪；圖為集團主席王強。 資料圖片
恒指9周RSI升到79，講緊係中線嚴重超買，即使喺舊年港股大時代遇上相若超買狀況，上升空間有限。既然𠵱家未至於舊年牛三嗰種炒少一日就好蝕嘅日子，喺調整出現之前注碼反而要縮減。即使短炒容易咗，仍應以
走勢容易捉路嘅股為先。調整後重拾回升動力，先係下一關鍵入市良機，到時注碼放大啲，回報都高啲。
星期二狗衝得嘅股，都係殘兵為主，終極殘股中聯重科（1157）都有第一棍，有可能資金已經買到最爛嘅股，不過，上海集優（2345）相信係異數。集優9月1日宣佈，母公司籌劃重大重組，同系上海電氣（2727）可能會發A股買資產，包括向上海電氣注入集優股權。單刁見光後，上海集優股價明顯強過上電，趁調整吸納集優更好。
始終集優係俾人收購嗰個，顧及中央利益，未來作價不容太低，集優市值僅22億元，相對賬面值37億元，市賬率0.6倍，假如上電發A股收購，作價以集優市賬率1倍計算，就等如集優現價較收購價有龐大折讓。
無論重組係咪對集優基本因素有利，過往重組嘅中資股，只要集團有番啲規模，重組股份多數有權強勢幾個月，所以集優絕對有權食埋下一轉升浪，唔好睇小佢。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com