生意難做 買收息股算數
2016年09月07日
港股前日升左三百幾點，昨日低開，但跟住跌唔到落去，個市結果再升，再向今年高位進發。
港股第三季累升左三千幾點，但同一個本地富豪傾起，大家都話生意惡做，成本貴、利錢薄，郁啲就會輸到入肉。不過，講起買股，富豪就話有得玩，今年幾個月，佢都不
停手入貨，只買收息股。
錢愈多愈難搞
傳統上，股市係經濟反映，生意唔好，股市照計好難得。富豪拆局，點解會市道麻麻，股市反而有得玩，講出嚟就係一字記之曰︰錢多。
佢話，佢成日同銀行打交道，感受到嘅係銀紙真係多，美國話加息話左5年，到O依家只係加左一次0.25厘咁大把。銀紙咁多，大家焗住搵嘢搞，所以做生意爭到頭崩額裂。以前香港最好做係地產，但O依家炒樓要畀幾樣辣招稅，帳面賺兩成隨時無錢落袋，呢排仲連地價都炒高埋，就算發展商都唔易做，連地產都無得做。佢喺O依家炒股，息口仲係唔錯，早排買滙控(005) 有7厘息，O依家都有6.6厘息，買呢啲藍籌收息夠畀銀行利息有突，起碼好過夾硬搵嘢搞。
講起話地產都唔易做，嘉里建設(683) 就公佈，就有關早前向控股股東Kerry Group旗下南潮控股(583) 以9.3億收購清水灣錄影廠的地塊一事，因有第三方出價9.9億元，經考慮後，公司決定不匹配有關價格，相關交易告終。南潮控股已於9月2日與第三方買方訂立第三方協議。
嘉里買地被人搶親
南潮即係以前《南華早報》，年前佢用屬下公司發股買左電視廣播嘅地皮，大家以為南早賣左媒體業務後，嘉里肯定食硬呢塊地，點知O依家都被人高價搶親。雖然南潮係自己友啫，但有人肯出高價，嘉里都無得夾硬嚟(因為係關連交易)，連佢想買地都咁樣，唔怪生意人話投唔到地，寧願買啲派息高、折讓深嘅地產股股票頂住先。
喺資金持續流入下，港股昨日雖然一度掉頭跌101點，但跟住股王騰訊(700) 發力抽升，帶領港股止跌回升過百點，以全日高位收市。恒指收報23787點，漲138點，國企指數收報9938點，上揚107點，成交唔多，只有756億元。
市值破兩萬億元的亞洲股王騰訊為升市火車頭，帶挈恒指54點升幅，股價一度再創上市新高，高見216.8元，收造215元，升2.3%。上星期好勇嘅滙控(005) 就唞氣，收報59.5元，跌左0.05元。中資金融股就造好，建行(939) 升1.3%，造6.07元；平保(2318) 升1.2%，造42.35元；港交所(388) 升1.9%，造198.1元；招商局港口(144) 為升幅最大藍籌，全日升2.9%，造23.3元；領展(823) 挫0.96%，造56.7元；長和(001) 為包尾的藍籌，收102.2元，跌0.97%。
內地8月重卡車銷量大升，東風汽車(489) 升3.7%，造8.74元；長城汽車(2333) 月銷量升25.41%，股價漲4.8%，收8.23元，為升幅最大國指成份股；瑞信升吉利汽車(175) 目標價至7.7元，股價亦升3.9%，造6.95元；廣汽(2238) 8月銷量升35%，股價漲3.49%，造11.28元；比亞迪(1211) 漲左%，造56.15元。
科網股呢排當炒，由創業板轉向主板嘅IGG(799) 再創轉板新高，公司市盈率20倍，息率4%，不過手遊公司唔係睇呢啲數據，最重要係公司話新遊戲收入過億元，下半年共有十款新遊戲推出，未知得定唔得佢已經炒定先。
陸羽仁
金融High Tea 舊文
來源 source: http://hdfin.stheadline.com