財經評論：
醜樓唔憂嫁的啟示
■華懋賣樓成為全城焦點，參觀海翩滙示範單位都要排長龍。 資料圖片
坊間常言，買樓首選新地樓，因為用料質素最堅。華懋樓又如何？大家或可嘗在Google搜尋輸入「華懋樓」三個字，便會出了一堆關於華懋樓用料質素的討論。
有地產代理同我講，的確以往同客人介紹華懋樓，大部份人
一聽見就say no。雖然好多人都未住過，人雲亦雲，但始終對華懋樓敬而遠之。那些年的華懋樓，除了為人詬病的實用率極低，經典縮水樓如沙田花園城及金獅花園，實用率得58%及61%，窗台去到心口咁高；又經常畀人話用料平凡，設計老土，間屋住住嚇漏水，保養經不起時間考驗。但坦白講，買樓呢家嘢，都好講運氣。任何樓都有機會漏水，有人住華懋樓住落二、三十年都沒有投訴。有人更話華懋樓的質素，「同長江樓咪又係差唔多」。事實上，長實樓客廳幅牆斜我都見過。
近十年華懋賣樓，鮮有引起各大傳媒報道，原因是華懋過去賣樓通常都會與「零成交」、「滯銷」拉上關係。但近日，華懋賣樓更成為全城焦點，集團發展的將軍澳海翩滙，先是參觀示範單位都要排長龍，到揀樓當日，更驚現逾千人排隊搶樓，嚇了大家一跳。這個賣樓盛況，絕對是地產界大奇蹟日。有人更把青衣灝景灣於1997年開售時位於銅鑼灣世貿中心的認購入票處，排隊人龍打蛇餅至紅磡海底隧道的墟冚賣樓情況，與華懋今次賣樓比較。
華懋樓也可一日賣470單位，創集團歷史新高，由貨尾王變賣樓王。跟據一手住宅物業銷售網成交冊顯示，華懋自2013年以來共發售逾10個樓盤，但在海翩滙開售前的這三年來，只賣出近160夥。
今日瘋狂的樓市，市民為求上車，只要價錢筍及有高成數按揭，口碑已成其次，醜樓一樣可以唔憂嫁。
記者：朱連峰
財經評論 舊文
來源 source: http://hk.apple.nextmedia.com