爆煲疑惑
2016/09/07 09:27:31
網誌分類: 經濟
美股長假期後復市，雖然經濟數據唔得，但加息預期下降以及能源公司和醫藥企業都傳出收購合併消息的推動下，美股先跌後升，納指更創出歷史新高收市。杜指收市升46點，報18538點；標普500指數升7點，收報2186點；納指升26點至5276
點。美股升幅唔大，但交投顯著較前活躍，估計係好多投資者及交易員放完暑假，昨日開始正式投入買賣。
美國昨日公布8月ISM非製造業採購經理指數（PMI）只有51.4，遠差過市場預期的55和7月份的55.5，更係2010年初以來最低。美國經濟數字比較差，美元亦即時作出反應，反映美元兌6隻主要貨幣匯率的美元指數唔夠一小時之內由95.6跳水至94.9，下滑了0.7%，美股亦由升轉跌，但好快又反彈回升。
Edward Jones的投資策略師Kate Warne認為，美股之所以能夠咁快擺脫頹勢，主要原因ISM數字雖然唔理想，但同時進一步降低聯儲局會作出忽然加息舉動的可能。睇股票恐懼指標VIX指數由上午12.93，一路跌至收市的11.85，對聯儲局加息比較敏感的2年期國債收益率由朝早的0.79厘一跌下滑至0.73厘，都係市場對加息預期下跌的反應。
昨日，市傳加拿大管道公司Enbridge以280億美元收購Spectra Energy，而醫廠拜爾（Bayer）提高收購Monsanto公司的競價由每股2.5美元至127.5美元；另外，分子診斷公司Cepheid宣布已被Danaher公司收購，作價每股53美元，被收購對象Spectra Energy大幅抽高13.4%；Cepheid仲勁，飆高52.6%！
市場上有併購消息傳出，可以提高市場的炒作氣氛之餘，更重要的是顯示了公司對市場前景有信心，對大市當然係利好因素。受到併購消息推動，安碩納斯達克生化科持股票基金（ETF）升1.2%，能源股析塊升1.5%。
美企第二季業績公佈期已經到了尾聲，至上週五，已有498家標普500成分股公司派發了成績表。與去年同期比較，第二季整體盈利下跌了3.2%，營收則微降0.2%。不過，市場預期今年下半年盈利會逐步好轉，第三季仍會下跌，但跌幅減少至負2.1%，而第四季增長5.5%，營收增長預期則分別為2%和4.8%。至於2017年，預期表現會好好多，標普盈利增長為13.3%，營收增長5.9%。
市場又預計盈利增長最大的動力會來至自能源和原料行業，營收增長最大的仍然來自科技行業，其它板塊盈利和營收增幅均將小於標普均值。
目前標普500市盈率（PE）為19.7，而預測市盈率（即未來12個月根據企業及分析預測的市盈率）為16.9，而10年的平均值14.7。翻睇美股過去市盈率，金融海嘯前夕的2007年7月中係19.7；而最低位係2009年3月9日，只有10.3。以2013年的年初為例，當時係17.3，但貴唔貴只係相對性，2013年的市盈率比起平均值似乎好貴，當時已經有專家，包括有末日博士之稱的麥嘉華，猛話市場已經過度高估，叫人沽貨，結果越沽大市越升。
美股連番創出新高，睇美股PE目前已經升至2007年的高位，係唔係好危險，一定馬上爆煲呢?
當股市的PE係10的時候，通常是見底階段；超過了平均數字16時，逐漸開始進入合理價位區；到升近20，雖然未必係最高點，但絕對是值得注意的警戒點；至於會延長多久，還要睇美股以至環球金融市場的狀況。睇美股預期市盈率只有16.9，反映企業及市場分析對於美企未來盈利前景的睇法比較正面，認為盈利最艱難係今年第一季，已經觸底，今年下半年會開始有番起色，炒預期的心態，亦托住股市的原因之一。
利息咁低，市場又熱錢橫流，有利股市炒作，睇指數出現三頂危險之狀，但未必話爆就爆，以去年經驗，佢可以在高位反覆橫行幾個月，比想像中遲爆。通常爆煲要等黑天鵝事件，例如突如其來的加息，11月大選有出人意表的結果，才會觸發沽貨潮。
陸羽仁
回應(0) 我想回應
陸羽仁 BLOG 舊文
來源 source: http://blogcity.me