財金冒險號：
從奶粉看樓市辣招
■深圳海關實施開罐檢查奶粉，令奶粉走私立刻絕跡。 資料圖片
深圳海關實施開罐檢查奶粉，奶粉走私者立刻絕跡。開過罐，買家唔知罐內奶粉有冇被掉包，就唔敢買，走私者就搵唔到人接貨，但用家唔受影響。這招「釜底抽薪」，能否應用到香港樓市？
香港樓價反彈咗幾
個月，且有北水南下掃樓跡象，有代理估樓價好快會創新高，適逢特首「選舉」臨近，樓市加唔加辣，肯定係焦點。
杜絕「走粉」，一招搞掂；打壓樓價，3D辣招搞極唔掂，分別在於奶粉係消耗品，純粹自用，樓卻有投資功能。最接近奶粉辣招嘅，係100%資本增值稅：賣樓賺幾多，就交幾多稅，杜絕炒家，但咁樣好似電療醫癌，癌細胞同好細胞一齊殺死，並唔可行。
試想買樓唔畀賺、只可蝕，原本想換樓嘅業主一定死攬唔放，以免跌入新稅制，二手市場死寂。就算有人堅持「買樓自住唔係投資」而入市，買咗都係自住，咁市場租盤冇增加，想搬出嚟住又冇錢畀首期者，就會搶高租金。原意保護用家嘅政策，結果愛你變成害你。
現行3D辣招雖然冇100%資本增值稅咁極端，但原理一樣。梁特政府洗濕咗個頭，冇可能喺咁嘅市況撤招，但願下屆政府咪再亂出招，而係專注增加土地供應（但唔係收番傑志足球場），至於更重要嘅減少需求（截停每日150個新移民），小生就唔奢望喇。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com