操盤手劄記：
人仔因一男子貶值
■有分析指，只要特朗普民調支持率持續走低，中國就敢於讓人民幣更快貶值。 資料圖片
武俠小說名家溫瑞安講過：「要瞭解對方是怎麼樣的一個人，只要看他有甚麼樣的敵人。朋友固然難得，但朋友可以五花八門，良莠不齊；敵人卻是有足夠份量與你為敵的人……一個高手
的敵人必然也是高手。」
10日之後就係美國總統大選，CNN最新民調顯示，希拉莉支持率為49%，領先特朗普5個百分點；ABC最新民調更顯示，希拉莉支持率為50%，達到民調關鍵門檻，算係半隻腳跨入白宮，並領先特朗普12個百分點。表面上，希拉莉嘅敵人係特朗普；實際上，佢嘅頭號敵人係維基解密嘅阿桑奇。
阿桑奇日前揚言會喺美國大選投票前，揭發涉及大選嘅重大秘密。希拉莉曾刪3,000封電郵，裏面有咩黑材料？買定花生吧！若果特朗普爆冷當選，市場估美股會急跌10%至15%，並引發環球股災。華爾街係希拉莉主要金主，近期就積極發功唱衰特朗普。
人民幣連日急跌，原來關特朗普事！離岸人民幣前日低見6.7885兌1美元，創2010年有紀錄以來新低，昨日才告喘穩。美國有分析指，離岸人民幣走低與美國大選有關，只要特朗普民調支持率持續走低，中國就敢於畀人民幣更快貶值。
聯儲局下周議息，雖然今次加息機會唔大，但12月加息機會超過七成。美息趨升，美滙指數逼近100大關，美元走強，令人民幣持續面對貶值壓力，市場擔心中國，以至亞太區出現走資潮，拖累股市。恒指昨跌239點或1%，收23325，10天、20天、50天線全告失守，動力變弱。
人民幣貶值，成本以人民幣計算，而收入來自海外市場嘅出口股最受惠。我嘅心水係梳化股敏華（1999），集團喺內地有唔少生產基地，但大部份產品外銷，可賺取外滙；而且喺人民幣貶值下，銷美產品更具競爭力。該股現價5.24元，預測市盈率13倍，預測股息率4厘，候低吸納之選。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com