港股跟着人仔走
2016年10月13日
十月開局，美匯強勢效應逐漸顯現，借住業績唔理想，美股前晚低收，港股開市再插，一度跌近300點。由於已經連插三日，市況午後開始喘穩，3點後反彈，但息口敏感股仲係有壓力、未解決。
呢期港股開市大幅波動，陸羽仁認為同人民幣匯價受壓有關，呢個因素中長期可能會吸引資金南下，但短期
就會觸動投資者神經，呢個係即時不利港股嘅因素。
恒指跟隨人仔午後回穩
另一樣係美國加息步伐漸近。從過去經驗顯示，美股通常會喺加息前回落，相信呢個預期效應會壓抑美股表現。
昨日港股基本上係同人仔表現走勢好接近，人民幣兌美元上午中間價連續3天刷新逾6年新低。中國外匯交易中心數據顯示，人民幣中間價報6.7258兌1美元，較昨日中間價進一步下跌160點子，是連續第六日下調，加上英鎊前一晚再插，市場情緒都幾差吓，港股好快下插。到左下午，人仔基本上回穩，其後反覆走強，收漲9點子，報6.7139兌1美元。夜盤進一步上升70點子；離岸人民幣漲88點子，報6.7209，較在岸收市價低70點子。交易員話，結匯需求小幅升溫，目前未見大行維穩跡象。由於美匯短期續大升可能性明顯下降，人幣續跌空間料較為有限。
照正路計，中央想人仔下調，但亦唔想佢急跌，有需要嘅時候應該會出手維穩，若然人仔匯價穩番啲，咁港股調整幅度應該會減低啲。港股經過三連跌，低見23267點，收市跌幅大為收窄。恒指收報23407點，下滑142點；國企指數收報9673點，跌131點，成交金額684億元。前日內房股下滑，昨日輪到內銀股被沽。借住野村下調多間內銀股目標價及評級，內銀股受壓，交行(3328) 挫2.9%，造5.77元；中國銀行(3988) 也跌2.8%，造3.47元，兩隻股份包辦表現最差藍籌，另外農行(1288) 挫3%，造3.27元。
今個星期國務院總理李克強到訪澳門，陸羽仁認為唔好期望領導人會為濠賭股送暖。李總行程昨日結束，呢個板塊全線下挫，銀河娛樂(027) 跌2.7%，造31.15元；永利澳門(1128) 挫2.8%，造11.68元；美高梅中國(2282) 挫2.9%，造13.24元。
南區商貿地有追捧
香港黃竹坑業勤街及黃竹坑道的商貿地開標，以25.28億元批予信和置業(083) 及由郭炳湘任主席的帝國集團，競投價又係高出市場預期。黃竹坑呢塊地有指定條款，要起好部份樓面賣番畀政府，以現價計樓面地價差不多要成萬銀一平方呎，計埋建築費若然將來要賣，差不多要成兩萬銀一呎。由於南港島線即將開通，區內工商住宅都係看高一線，港鐵(066) 喺南區有個大地盤，喺通車後會拎出來招標，呢塊住宅地主打中小單位，肯定係一大塊肥肉。
港島O依家基本上無乜土地可以興建商廈，黄竹坑將來交通改善，早就吸引大戶落注，但若然南區商廈都話賣兩萬銀一呎，咁其他灣仔以至中環又值幾多錢呢？若講真正商廈地王，應該數中環新填海區，O依家有說法係政府會將中環郵政局搬去新填海區，屆時騰空土地，咁呢塊就真係黃金寶地嘞。內資買本港商廈熱潮未散，所以早排冒高嘅萬邦投資(158) ，調整咗幾日，昨日又見逆流而上。
陸羽仁
金融High Tea 舊文
來源 source: http://hdfin.stheadline.com