智取大市：從基金執倉取利
■滙控係年底前穩贏之選。 資料圖片
點解一個特朗普出現，會令到全球股市走勢分裂到如斯程度，周四晚美股三大指數各有各走，道指破頂之際，周五港股跌三舊，夜期再跌。
望真啲，其實並無分裂到，問題在於美股有好多特朗普受惠股，港股就有太多受累股，大家係受同一因素影響
。再者，明年仲有通脹呢個重點等住發酵，於是觸發基金經理提早執倉。正常情況下，透過執倉換馬，基金同樣可達到減磅效果，以減低風險，冇必要隻隻沽。例如基金揸重騰訊（700），只要每人減啲，已經令騰訊跌極唔停；至於江銅（358），隻隻基金都發現自己冇貨底喺手，所以唔狗衝唔安樂，結果就咁喪升上去。
呢個過程完成後，基金總持倉可能多咗，亦可能少咗，就當持倉少咗，沽完10蚊賬面已贏到開巷嘅騰訊獲利，再用3蚊狗衝江銅，對基金經理嚟講仍comfortable，呢點可解釋滙控（005）等逆市升嘅原因。
滙控突破60蚊阻力後，喺65蚊之前可謂毫無阻力，升勢途中做完杯柄，急插過再拗腰升，似乎強勢冇嘢阻到。滙控本來街貨超多，大戶操控能力低，所以甚少假動作，一旦突破就係真升勢，所以滙控係年底前穩贏之選。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com