喝一口，才吃一口
再強大的公司也逃不過白養冗員的厄運，但最厭惡這些窩囊廢的往往不是高高在上的管理層，而是一班每天拼死扭盡六壬也要推起公司生意的前線鬥士，如我。
正所謂你有壓力我有壓力，你冇建樹唔緊要喎，做乜要走嚟挑釁我？
臨放工前，我收到一個 email，內容只是兩行字，再 atta
ch 一個 excel file。
廣告
這個 email 的中心思想是，葉朗程，你最近食咗公司好多錢。
我嘅 reply 係，你知唔知呢個世界點做生意？平時冇事冇幹就唔使搵人，然後嗰個 quarter 唔夠數啦，就逐個客打電話 sell 嘢，咁呀？係就死咗九年啦小姐，乜嘢叫 relationship management 你曉唔曉？你男朋友試嚇平時唔搵你，到痕痕哋嗰陣先叫你上佢屋企幫幫手，你唔星佢兩巴我跟你姓啦。女要氹，客要湊，ok？
廣告
食咗公司好多錢？湊客就梗係食飯㗎啦，食飯就梗係用錢㗎啦，不如約佢去南華會打桌棋好冇？
家陣我係食咗公司好多錢，唔係蝕咗公司好多錢吖嘛，你 send 個咁嘅 email 畀我做乜呢？最唔用腦就係，你擺明不懷好意，個上款仲夠膽死寫 Dear Marcus，你係咪覺得自己好幽默？
發洩完。
狗噏嚇啫，我當然冇咁 reply，葉朗程嘛，斯文人來的，寸人都要有修養，佢兩行字，我回夠三行。
Thank you for the heads up.
What a fascinating record.
I will keep up with my good work.
寫嚇寫嚇，感覺又舒服咗啲，突然想由「冗員最愛 send 的白癡 email」跳去另一個 subject。
若然不是她這個 excel file，我也不曉得原來我可以花這麼多錢吃飯。
除咗公司畀嘅，自己私人飯局的支出其實也不遑多讓。
食好嘢對我嚟講係一星期最少四次嘅例行公事，所以我並冇好似其他人咁，食過乜嘢好餐廳就 post 上 facebook。如果我餐餐都咁 post，我怕人哋會覺得我嘅人生就淨係得呢啲嘢，好似係一種另類嘅「頹」，感覺極不良好。
咁當然，例行公事之中，也會有一些刻骨銘心的味道。
這種回憶，絕不是無厘頭一句「君悅酒店嘅海南雞飯係最好味」就能夠交待清楚的。
四季酒店嘅海南雞飯、鰂魚湧嘅「隨心海南雞飯」、跑馬地嘅「大少爺海南雞飯」(已結業)，先唔好講邊碟好食啲，要是將君悅那碟跟其他的同桌競技，你講唔講得出當中有咩分別都成問題，啦，阿嬸。
嚐過三種值得回味的味，不是什麼最好最正最爆，而是實在很難找到近似的體會去相提並論。
巧合是，三種味道也屬甜。
這是習慣，也是策略，同朋友食飯，尤其同女士食飯，主菜的份量只能佔據你與她的六分飽，because you must let sweetness play as big a role as possible，畢竟只有甜這種味道才配得起「浪漫」兩個字。
第一級刻骨銘心，叫做 Iced Cappuccino ，當然唔係普通一杯「凍及」，而係 Nobu 獨步天下嘅甜品，喺全世界每間 Nobu都食到。香港嘅 Nobu 叫佢做 Iced Cappuccino，但外國嘅 Nobu 有個更有 gimmick 嘅名，叫Miso Cappuccino。小小一個杯，盛著咖啡雪糕，匙羹直插到底，貫穿綿脆有序的泡沫、核桃、蛋白，送進口裏的一剎，會讓你瞪大再瞇起雙眼，就好像被一個美女強吻下來一樣。
第二級刻骨銘心叫做西多士，係人都知西多士英文係 French toast。如果你曾經 question 過到底 French toast 有乜咁 French，你其實可以去喜來登酒店找到答案。好食嘅西多士外層唔單只要脆，仲要脆得嚟鬆化，麵包入口即溶得嚟又唔可以太過濕淋淋，Sheraton 這個好西多士就正正做到這種境界。
Sheraton 裏面幾間 restaurants一向都有番咁上下名氣，其中一間已經算係名不符實嘅叫做「雲海」，即係佢哋嘅日本餐廳。所謂名不符實，唔係話唔好食，而係今時今日咁嘅價錢絕對有更好選擇。不過好奇怪，好多老前輩級嘅客戶仍然鍾情雲海，搞到我食食嚇都變咗熟客。
一間餐廳一旦當你熟客，嗰份面子，可以好不得了。
每次帶朋友去雲海，我一定叫西多士，貪佢哋個 menu 裏面冇呢樣嘢。西多士係 Sheraton 樓上 Oyster Bar 嘅甜品，正常只會喺 Oyster Bar 食到，但雲海嘅同事知道我鍾意，所以每次也特意作出這樣的安排。What you order from the menu 當然重要，but how you order it also makes a difference。
第三級刻骨銘心叫做雪影杏汁包，來自二十六歲的一個晚上。嗰晚我喺公司留到八點幾，唔係因為忙，而係我畀老細省完，佢叫我諗清楚自己係唔係適合呢份工。坐著發呆的時候，有位女同事走過來問我做乜仲唔走。差唔多走喇，我紅著臉說。「有冇約人食飯？」她問。我話冇，佢叫我同佢一齊食啲嘢。唔記得自己係扮 cool 定真係唔想食，我最後答佢冇胃口。她想了一會說：「冇胃口唔緊要，我帶你食啲唔使好大胃口嘅嘢。」之後佢去自己個位，攞咗個暖壺，然後我哋一齊搭的士去銅鑼灣。去到利園一期，佢叫我等佢一陣，隔咗唔知幾耐佢就攞住一個盒仔落嚟，裏面裝住三個西苑馳名嘅雪影杏汁包。
我哋企咗喺Hermes嘅廚窗前面，佢打開暖壺，叫我飲一啖，原來係烏龍茶。跟住佢就打開個盒仔，叫我試一件，呢件就係我人生第一個雪影杏汁包。「得唔得呢？」她的嘴角漾起一個自信的微笑。軟軟的外皮，藏著熱騰騰的杏汁，由冇胃口變有胃口原來是一個超越味蕾享受的過程。
由那晚開始，每有機會吃到這個杏汁包，必定會事先用暖壺盛著烏龍茶。
喝一口，才吃一口。
簡單一個習慣，就是一種回味。
來源 source: http://thestandnews.com
生活 - 葉朗程 舊文