智取大市：
恒指恐見兩萬點
■恒指周二反彈的動力來自中移動低位反彈。 資料圖片
鐵礦石期貨跌停板，強勢資源、商品股洗倉潮，連江銅（358）都頂唔住，炒股不炒市嘅最強板塊都倒下，單靠匯控（005）可頂到幾時？恒指周二反彈的另一動力係來自中移動、內銀、地產股低位反彈，呢批弱雞嘅特朗普輸
家只係微微向上，恒指談唔上有轉勢跡象。
連近期最好炒嘅資源股都元氣大傷，包括小弟在內嘅投資者都感到氣餒，打擊咗市場信心，就令後市更大機會向下發展，唔跌到吸引水平，點會有新錢衝入場買貨。
其實恒指圖表同騰訊（700）大同小異，都係一個圓頂。恒指喺美國大選前已經跌破頸線，而特朗普當選後急反彈，已經確認完成後抽，然後一連兩日下跌，恒指已測試返特朗普當選日嘅低位水平。
睇番舊年4月至6月，以及舊年10月中至12月底，其實都形成咗同近期相當近似嘅派發形態，併圖一看，目前恒指仲未出現最急劇跌勢，而根據對上兩次往績，恒指可以有至少一成下跌空間，即係話，恒指有機會下試兩萬點。策略係避去有條件逆市升嘅股份，細價股彷彿仲穩陣過大價股，如果揀唔到，唔揸貨都唔係壞事。如果恒指真係下試兩萬點，終極機會來了！
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com