財經評論：
金管局敲響財仔喪鐘
■2016年財務公司真係可以用頭頭碰著黑嚟形容。 資料圖片
2016年差唔多過去，呢一年，財務公司（俗稱財仔）真係可以用頭頭碰著黑嚟形容，年初政府出招打財仔中介、假按揭事件肆虐，到年尾金管局再出必殺技，宣佈下年推出「樓按提示服務」，可以話係敲響咗財仔喪鐘。
金
管局呢招個名好似好無氣勢，但操作起上嚟殺氣騰騰。講番個背景先，以往業主去銀行借完按揭貸款後（即係一按），唔少會靜靜雞去財仔再借多筆（即係二按），而呢件事係銀行不容許，就算你二按借1萬蚊都好，你都要問銀行拎consent。
不過，銀行無咁得閒逐個查你，所以唔少客人靜雞雞借凸咗。但係，喺金管局電子提示服務推出後，下年起你試嚇喺銀行申請完按揭後，之後去財仔借多筆，再去埋田土廳上冊，呢個時候，就好似手機嘅push notification咁，銀行即刻知道你踩界，結果客人無二按可借，財仔無生意可圖。
你或者會問，銀行係咪咁霸道先，點可以唔畀人借二按。的確，一按銀行係真係可以好霸道，因為佢係一按債權人，就算業主破產，都係由一按銀行拎番啲還款先。新例之後，所有業主無得偷雞，申請二按前，必須要問銀行拎consent，先可以去財仔借，但銀行點會戇居居畀consent你，「去財仔？嚟我度借咪得囉」，或者係，「無收入證明？可以用其他方法證明嘅，但consent就唔畀得住喇」。
所以，財仔二按生意，大部份都可以摺埋。查實，二按業務真係相當和味，冇事冇幹，利率可以高達20厘，that"s why財仔近年喪做，不過回報高，風險亦高，如果業主破產，物業變咗銀主盤變賣，錢係要賠畀一按銀行先。
咁財仔可唔可以轉做一按生意？難矣，財仔嘅資金成本其實好重，本地銀行係唔會借錢畀財仔做按揭生意，除非財仔接受金管局規管銀行按揭業務嘅金剛箍，所以唔少財仔都係靠股東資金；大型財仔就可以去海外source資金返嚟，唔少來自新興國家。
唔好彩地，美國聯儲局加息再即，今次極有可能展開加息周期，容易令新興國家資金流走，息率扯高，如果財仔個盤唔夠大，得8厘嘅一按係無利可圖，再加埋樓價若果有下行跡象，按揭成數ceiling因應風險要再降低，咁邊個會幫襯呢？又點做生意呢？小型財仔嘅就真係不要說了。
有人話，做開按揭嘅財仔，可以試嚇轉做消費貸款，不過遺憾嘅係，消費貸款同按揭貸款嘅business model完全唔同，同埋市面上已經有做消費貸款龍頭，想同佢哋鬥，真係不如直接轉行好過。
其實今年年中發生過唔少財仔畀假按揭文件呃到攤攤腰嘅事件，新聞報好似唔係好多宗，但實係非常多中小型財仔瀨嘢，但佢哋無同人講過，因為財仔最需要嘅係聲譽，講完同摺咗間嘢分別唔大，呢件事本身已經令財仔業界元氣大傷。
總括而言，𠵱家差唔多有1,800張財仔牌，應該會係香港歷史嘅高峯，下年有機會逐漸回落，個牌賣得嘅就賣，摺得嘅摺，汰弱留強，不過可以肯定嘅係，二按佔比只係成個物業市場嘅一條毛，對樓價影響不大，唔會成為壓倒樓市最後一根稻草，但金管局隔山打牛就相當高招，財仔真係喊三聲。
記者：周家誠
財經評論 舊文
來源 source: http://hk.apple.nextmedia.com