中環在線：
郭炳江父子狂操ICC垂直跑
■黃植榮噚日講起跑步就眉飛色舞。
新鴻基地產（016）近年熱衷搞運動項目，支持舉辦ICC跑樓梯同單車節兩大活動，但大股東郭炳江因未學識踩單車，早兩個月只能夠喺場邊為阿仔郭基煇踩單車打氣。不過跑樓梯就唔使學，練習嚇就跑到，佢下月4日終於可以父
子兵參加「新地公益垂直跑」嘞。
新地第5年舉辦ICC垂直跑，要一口氣跑完超過2,000級樓梯，事前的確要練嚇氣同腳骨力。郭炳江雖然64歲，但平時keep住做運動，加上佢同郭基煇一齊操練，到時落場應該難佢唔到。可惜，佢細佬郭炳聯今年未能落場，唔知佢哋邊個快啲喇。
老臣子陪跑
唔講唔知，同樣係64歲嘅新地老臣子、副董事總經理黃植榮亦係運動健將，佢舊年仲同班同事跑完倫敦全馬，真係唔講得笑。
黃植榮噚日難得同傳媒食晏，佢今年係第3年跑樓梯，佢話同馬拉松好唔同，跑樓梯唔可以只係靠快，要識得調節速度，先至夠耐力跑完全程。黑黑實實嘅黃植榮一講起跑步，即刻眉飛色舞，拋出一大堆體育專有名詞，點睇得出佢本身係一名測量師。
所謂三句不離本行，佢講完跑樓梯，轉頭都係講番地產。佢認為，香港土地少，要發展自然要垂直發展，咁先至可以利用土地，垂直跑自然啱曬呢個主題。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com