債息升不利收息股
2016年11月17日
港股昨日先升後跌，繼續乏力，好多收息股都陸續後退，反映特朗普帶嚟嘅債市退潮效應。
特朗普當選，最唔開心嘅係邊個？茶友話，政治上當然係希拉莉啦，投資上可能就係一班借貸人。因為特朗普主張要搞多啲嘢，增加投資，投資要動用資金，咁啲錢多啲出路，借錢自然無咁平。未來政府要使多啲
錢，咁就要印多啲國債，咁國債供應多，自然要俾貴啲息啦，所以佢上任以嚟，國債息口就反覆向上。咁究竟債息見咗頂未？就要睇佢將來使錢使得有幾疏爽，若然佢真係大使，咁債息仲未升完，喺咁嘅勢頭下，債券自然要跌吓價。
領展賣產推唔郁股價
前兩日金融管理局公佈外匯基金投資收入好靚仔，好多人跟住就提醒金管局要醒定啲，小心債市會腳軟。金管局總裁陳德霖明顯都睇到呢樣嘢，明言特朗普不利債市，外匯基金投資大量美債，債價一跌，投資收益受壓。
債市唔好對股市影響係兩刃劍。理論上債券價格下跌會將資金驅離債市，部份會投入股市，利好股價；同一時間，對於收息或公用股呢啲偏向定息嘅股票就不利。
港股昨日雖然跌得唔多，但好明顯買嚟收息嘅股價就受壓，好似我呢排成日話留意佢會跌嘅領展(823) ，又插多0.85元，收報51.3元，創咗特朗普當選後新低。領展最近宣佈再賣商場，理論上會有一筆賣產收入，可分派利潤會增加，仍然無阻佢股價調整，可能美國總統呢劑「特效瀉藥」，不利呢類收息股股價。
呢兩年領展管理層好多動作，一時又投地起商場；一時又賣產；一時又北上，但陸羽仁講過佢嘅股價表現，同呢啲高薪聘請嘅管理層所搞嘅動作關係不大，最直接掛鈎係美國長債嘅表現，美債價格表現好債息低，佢股價就好，根本就唔使搞咁多嘢。從呢個角度睇，若然美債息再升，領展股價就好有可能未跌完，投資者唔好因為賣產呢啲花招影響咗真正嘅焦點。
同一情況都發生喺其他收息股之上，中電昨日跌咗1.25元，收73.6元，中電今年高位84.35元，碌吓碌吓跌咗差不多一成，雖然調整幅度唔算好大，但就同佢過去幾年跑贏大市嘅強勢唔同咗。由於佢股價唔算太平，暫時仲未宜撈底住。另外如越秀房產基金(405) ，昨日跌0.9%收4.23元，由於債息的天花板移高咗，令人仔跌深啲，越秀基金的低位下移，要買都唔好大手入貨，要小心收息股要等多幾個月才見底。
市場對美國加息預期升溫，搞到美元走強，港股暫時都好難有運行，個市昨日雖然高開，之後都因人仔再跌添壓，午後由升轉跌，恒指收報22280點，跌咗43點；國企指數收報9362點，下滑35點，成交金額659億元。周二晚突公佈主席辭任的中海外(688) 股價借勢跌3.3%，報收22元；同系的中海宏洋(081) 更急挫8.2%，收2.8元，市場氣氛不利中港地產股，相關股份借啲意就插落嚟。
騰訊業績好唔過預期
騰訊於公佈季績前獲多家大行唱好，股價強勢反彈，一度逼近200元，高見199.5元，全日逆市升1.9%，報196.9元。騰訊收市後公佈，截至2016年9月底嘅第三季業績，盈利106.46億元人民幣，按年上升43%，按季下跌1%。初步市場應係符合預期。通常喺跌市，業績符合預期亦可以解讀為好唔過預期，咁可能係唔多夠嘅，所以要提防反彈之後，股價要再試一試支持位。
收市後另一個消息係政府公佈觀塘茜發道對出住宅用地，由會德豐(020) 旗下會德豐地產以63.88億元奪得，呢塊亦係加咗樓市辣招後首幅截標的地皮。以截標價計項目總樓面約826546方呎，每方呎樓面地價約7729元，雖較市場估值還高出約7.3%，但同之前同屬九龍東啟德嘅官地賣成一方呎14000元比，顯然已冷靜好多。會德豐近年投地甚勇，單係九龍東內的住宅及商業項目，已有澳南四個住宅項目、Peninsula East、One Bay East及明年起陸續推出的啟德住宅項目、8 Bay East、日出康城第5期、第7期及第9期，可以話係新一代的樓市大好友。
陸羽仁
金融High Tea 舊文
來源 source: http://hdfin.stheadline.com