笑到最後：不問價追彩星玩具
■彩星玩具有份製造嘅忍者龜玩具係熱賣產品，帶挈股價炒上冇難度。 資料圖片
長和（001）接連回購，臉書亦都宣佈回購計劃，即個市見底不遠。高明即刻搵其他股份，發覺有一隻比起長和更早回購，就係彩星玩具（869）。
彩星玩具喺14號打後四日喺1.2蚊回購。公司
現金已經有10.5億元，除咗應付賬等之外近乎冇負債，現金資產加埋殼價，公司至少值1.42蚊。加埋有8.3厘息、PE得5.29倍，美國嚟緊星期五同聖誕節都係收割期，美國沃爾瑪同玩具反鬥城網站顯示忍者龜玩具係top list，好似舊年年尾咁炒上2蚊唔難。
不過線人報料唔可以淨係睇業績，要睇埋主席陳俊豪同佢哥哥陳俊懷單官司。陳俊懷就彩星附屬2000年蝕售4.28%彩星地產（075．現稱渝太地產）股權的交易提告。今年5月主席陳俊豪上訴敗訴。
線人話，一、哥哥陳俊懷早年意見不合自立門戶，如果放低咗會唔會係咁打官司？打官司過程亦顯示陳俊懷要求證監會取消陳俊豪出任公司董事資格。合理懷疑有人想取而代之。
二、主席股權被虎視眈眈，難保他日家族爭產。相反錢落自己袋就冇得拗，參考彩地低價出售被挑戰仲要賠償嘅結果，反行其道炒高、配股、派特別息更合理。2014年1月彩星玩具趁股價高位4蚊配股，套現2.88億元。同年3月宣佈派特別股息0.1元，再加0.05元末期息，以當時陳俊豪一致持股5.96億股計，當時收息8,900萬元，翌年全年再派連同特別股息每股0.15元，再兩年合共收收息1.8億元，等同大部份配股所得。
三、現有十億元現金，業績一般，貿貿然派特別股息奇怪，不排除中期業績不振係為咗下次小陽春而嚟，營造一盤靚數炒上。
主席陳俊豪打官司時透露，陳大河「父訓」忠告佢要趁「小陽春」賣股套現。現時彩星股價低殘，參考上次股價4蚊時，以一成折讓價3.6蚊配股，估計對於陳大河家族嚟計，4蚊先係小陽春價。要買到倍升股，就係呢隻，所以高明建議不問價追彩星玩具！
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com