智取大市：新世代股樓關係
■炒股永遠要考慮樓市走向。 資料圖片
以前啲人話股市行先、樓市行後；𠵱家好多人覺得，股樓已再無關係。其實，股、樓並非冇關係，只係樓市遠遠跑贏股市，形成樓市升、股市未必升，而股市跌、樓市未必跌嘅情況。炒股，永遠要睇埋樓市走向。
講番2009年到𠵱家發生乜事，
喺銀紙泛濫嘅年代，環球M2貨幣供應不斷增加，但物業新供應有限，加上租金回報上升，帶動物業價格爆升；與此同時，貨幣供應不斷增加之下，投資者難以有效益地尋找合適嘅企業進行投資，令港股嘅股息回報不及港樓，尤其中港企業嘅盈利能力冇隨住貨幣供應增加而提升，所以港股遠遠跑輸港樓。
至於之後點？喺樓價見頂之前，資金鏈未出現系統性風險，港股亦會衰極有個譜，恒指一如以往，喺兩萬點左右點都有支持。不過港樓價格已經升到難以令港人承受嘅水平，長遠幾可肯定會較現價大幅下跌。假如樓市泡沫爆破，等同將2008年海嘯後的一切規則完全改寫，到時要用一套更悲觀嘅思維去睇呢個世界。
結論：有一日股市free fall的話，撈唔撈貨？睇住樓價跌唔跌就知點做，樓價唔跌？呢個就係恐慌性買入嘅機會。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com