深港通漏漏哋氣
2016年11月30日
經過一輪醞釀，深港通啟動有期，但利好作用好似隔夜油炸鬼漏晒氣。有中環茶友話，自從2007年炒過一鋪港股直通車，阿爺開始明白如果資金喺股市南下，好容易變成走資途徑，所以搞兩地股市互聯互通，即使資金炒完唔畀走，亦都唔會畀佢火紅火綠，所以呢個情況大家應該預咗。
茶友話，中央畀
深港通啟動，唔多唔少有兌現承諾嘅味道。北京講過今年會有深港通，O依家距離年底時間有限，要做就剩低一個月，阿爺講得出就要做得到，所以點都喺年底前通咗佢。要留意嘅係，自從美國大選完，美金係咁升，阿爺雖然無托住人民幣匯價，但唔代表唔關心，特別係內地外匯流失嘅情況。喺公佈深港通嘅前夕，《華爾街日報》出咗段報道，透露中國擬收緊海外投資，以便進一步控制資金外流。
中央出招限海外併購
報道話，中國政府近來一直不斷加強資金控制，比如限制內地居民購買香港保險、又限制比特幣交易，但企業海外併購一直受到政府鼓勵，長期開綠燈。因此收緊海外投資是外匯管制的又一新突破。
依照O依家嘅新安排，正在醞釀的措施主要針對超過100億美元的大型海外收購項目，以及超過10億美元的海外投資。中國海外投資今年大幅上升，項目總額已達1459億美元，比去年同期增長50%。隨著海外投資高速發展，政府開始擔心部份海外投資項目是掛羊頭賣狗肉，旨在逃避外匯監管，因此新規定將授權商業部和發改委審核大型海外投資項目，並有權拒絕「不適當」的項目。
依照呢個思路，深港通開通咗，未必等如北水可以大舉南下，呢點可以由已開通嘅滬港通睇到，呢排人仔匯價雖然下降，但都見唔到資金透過港股通大舉買港股，所以唔怪得市場懷疑深港通開咗，係咪有好多人落嚟買嘢。茶友話，以前內地資金唔可以嚟香港買股，對本地獨有嘅股份好有興趣，充滿憧憬，譬如好似滙控(005) 、港交所(388) ，但呢啲港股O依家對內地人的吸引力似乎逐步下降。
趙樓神預告賣樓難達標
除咗股市，樓市都一樣。今年新盤好多都係內地人買嚟投資避險，但特區政府先來一招大加辣，再加阿爺加強控制境外投資，變成連環打擊。就連多計見稱嘅長實地產(1113) 樓神趙國雄都預告，今年未能完成年初訂下銷售3000伙的目標。
趙樓神預告賣樓不達標之餘，不忘補番幾句O依家人仔有貶值趨勢，多了資金來港，即使有印花稅等調控措施，但由於現金貶值速度所造成的損失，或會多於印花稅稅項，加上按揭利率低企，相信除非大環境出現重大改變，否則相信資金仍會流入本地樓市。即使我信樓神吹水的角度，但香港資產要有賣家，都要水源唔好畀阿爺斬斷先得。
深港通下周一通車消息漏漏哋氣，大市喺期指結算日出現回吐，恒指全日跌93點，收報22737點，跌93點；國企指數收報9846點，下滑29點，成交金額687億元。深港AH股普遍回軟，晨鳴紙業(1812) 跌2.3%，報7.64元；東北電氣(042) 報2.91元，大跌6.43%；山東墨龍(568) 挫6%，報3.43元；浙江世寶(1057) 更大插17.52%，報10.64元。
大市水乾乾，大家炒吓首掛股仔，經營越式餐廳「越棧」的膳源控股(1632) 首日掛牌，開報3.06元，高低位分別為3.64元及2.69元；收報3.51元，較發售定價2元，上升1.15元或75.5%。不計手續費及佣金，一手2000股賺3020元，呢啲升得咁多嘅新股仔，真係可遇不可求，認購成功者真係應該幫襯佢食番餐。
陸羽仁
金融High Tea 舊文
來源 source: http://hdfin.stheadline.com