操盤手劄記：深港通遇上iPhone
■市傳蘋果公司打算於新iPhone引入可彎曲屏幕。 資料圖片
踏入12月，嚟緊星期日係意大利修憲公投，月中係聯儲局議息。美國第三季GDP增長好過預期，令加息理據增強。隔晚美股納指再創新高，港股昨日跟隨高開過百點，惟收市僅升52點，報22789，
未能守穩100日線（現處22822）。外圍避險情緒升溫，港股料於百日線繼續爭持。
市場預咗聯儲局今次出手加息，又預計明年6月再出手。美滙指數連續11個交易日高踞100之上，美元強勢，亞洲貨幣受壓，摩通亞幣指數跌至2009年以來最低，新興市場走資嚴重。為防滙市風暴傳導，引爆金融風險，中國紮行馬應對。
周日晚上《新華社》發出人民銀行副行長易綱撐人民幣專訪；翌晨《人民日報》刊出題為《若短期無剛需則沒必要換滙》的文章；與此同時，發改委、商務部、人民銀行、外管局一齊就對外投資政策解畫。短短十幾個鐘，官員、官媒連環為人民幣護航，密集程度罕見。
深港通終於擇吉下周一開車，其實無論滬港通抑或深港通，都係協助A股國際化，以及人民幣國際化嘅國策，香港嘅角色只係促進國際資金流入內地。不過，人民幣國際化係雙刃劍，若有外國勢力想中國亂，必會發動一次金融危機，而只有人民幣國際化，先能夠利用市場之力成事，難怪中國嚴陣以待。
講番深港通，最大特色係新增95隻中小型股，內地股民散戶主導，偏好炒細價股，啱曬脾胃。呢幾日細價股禾雀亂飛，但大部份同深港通無關，小心莊家借艇割禾！深港通入圍股中，我嘅愛股通達（698）連續兩日破頂後，昨日回吐一格，報2.28元，可候低吸納。
通達除咗受惠深港通，亦受惠iPhone。據《華爾街日報》講，蘋果打算喺新iPhone引入「曲mon」（可彎曲屏幕）技術，明年推出。通達早前成為蘋果供應商，提供防水外殼零部件O-Ring，公司又係已推出曲mon手機嘅vivo供應商，喺呢方面有優勢；隨著曲mon風潮，其他客戶如華為、中興（763）等，相信亦會陸續落單。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com