意國公投前咪高追
2016年12月01日
11月份港股埋單，全月計算，恒指累積下跌145點或0.63%；國指累積下滑279點或2.92%，回落幅度唔算太多，但對比美股屢創新高，固然係失威，就算比起內地A股都明顯不如，呢個月上證指數累積升4.8%，創8個月最大單月升幅。
內地股市比
香港好，主要有兩個因素，一個係人民幣轉弱，對內地出口、旅遊有好處；二係內地整合產能，部份行業開始有番啲效益，最明顯係煤價。由於增長放緩，內地對能源需求急降，加上環保要求，令煤價大跌。中央喺最近兩年開始汰弱留強，將劣質同環保條件差嘅煤礦關閉，終於喺年中頂住煤價跌勢，煤股開始回升。以中煤能源(1898) 為例，佢一度因為被踢出指數成份股，加上業績欠佳股價大跌，最低跌到去2.5元水平，隨著煤價喺去年回升，中煤股價今年向好，昨日報收3.91元，同低位相差近五成，同樣走勢喺其他煤礦股身上出現，呢個亦係內地去產能嘅效能顯現。
內地減少低效生產力，既有利資源整合，同時可減低不斷跌價的通縮威脅，不過呢個措施作用不能無限放大，因為去產能只係改善左供應過剩，點樣推動需求仲未解決。以煤價為例，佢升到咁上下就有阻力，唔容易向上突破，所以煤股炒到O依家就要小心。要留意經濟面有無改善，推動能源需求，否則煤股好可能已經走左大部份反彈嘅過程。
大行借意炒物聯網概念
O依家內地嘅產業結構調整，大方向都係減，將過去幾年投資氾濫嘅產能減番低，無論能源、鋼鐵都係咁，同時希望帶動新興產業同埋內部需求，但呢樣嘢仲要等。O依家人民幣下調，多少紓緩左中國出口嘅壓力，有助改善基本面。有人認為O依家人民幣下調幅度仲未夠，但如果跌得太急，又擔心會引起震盪，所以估計中央都係希望同美元保持穩步有序調整。
昨日大市炒作理由之一，都係同中央產業改革有關。聯通(762) 傳出會有混改方案，股價一度爆上逾一成，雖然公司澄清混改方案仍處於討論階段，股價仍升7.4%，報9.42元。
聯通炒作混改，其實有啲借意炒作內地電訊股嘅物聯網概念，美銀美林發表報告就話，內地電訊公司最大業務發展潛力在於物聯網。國家工信部估計，中國物聯網市場年均複合增長率可達15%，2020年市值料達1.5萬億元人民幣，當中一成屬聯繫市場的收入機會。內地電訊商正主動發掘與物聯商供應商的合作機會，以提供完整物聯網解決方案。
周日公投前市場觀望
報告話，在未來數年，新興業務將會是內地電訊商的收入引擎。美銀美林提升2017財年行業固網服務收入增長預測，由6%增至7.5%。由於移動通訊業務競爭激烈，令每月每用戶費用(ARPU)受壓，該行下調行業移動通訊業務收入增長預測，由5%降至4%。對於呢個概念，該行就較睇好聯通(762) 及中電信(728) ，評級均為「買入」，聯通目標價12.1元，中電信目標價4.8元。大行睇好呢兩間公司，其實一字咁淺，就係佢地估值平啲，而且大家混改，佢地有可能「被混」，咁自然容易啲反映到身價。
而喺聯通帶動下，恒指收報22789點，升左52點；國企指數收報9838點，下跌8點，成交金額889億元。不過，呢排個市唔係大好格局，加上市場憂慮即將於周日舉行的意大利修憲公投結果或對環球股市構成衝擊，要買都唔好咁快郁手。
陸羽仁
金融High Tea 舊文
來源 source: http://hdfin.stheadline.com