笑到最後：
重申樓價再升一成
■辣招最成功之處就係挾升樓價，令發展商賺盡。 資料圖片
「呢個高明真係食屎」、「高明定白癡？」、「妖言惑眾、當自己係專家」。一個月前，本欄寫「辣招令樓價再升一成」，部份讀者閱後有以上留言，而上述呢三個留言，措詞已經算相對溫和。
只不過係一個月，細價樓就再
創新高，包括九龍灣淘大花園200餘方呎「迷你戶」升破400萬元，單位呎價1.6萬元，為屋苑史上最貴迷你戶；鑽石山鳳德邨一間150呎單位亦以190萬元成交，貴絕市區劏房公屋，呎價12,418元。就算係整體樓市，中原城市指數亦由撰文時嘅143.68點，微升0.5%至144.47點。政府宣佈雙倍印花稅劃一15%加辣，全城專家睇跌，只有高明睇升，睇法比其他人有前瞻性，捱鬧係必然，但現屆政府加辣令樓價再升，受害嘅只係未上車嘅準買家。
重申一次，辣招嘅最大功效在於打壓供應，過去嘅辣招已經趕走炒家，令市場失去流動性，二手市場可以提供流動性嘅只剩下用家同收租嘅投資者。加辣令用家同投資者難以換樓，一動不如一靜。二手盤源更少，定價權落入發展商手上，當然唔會同你客氣，發展商計盡準買家購買力嚟鋸，喺用家買得起嘅總金額不斷減呎數，務求賺盡。少數有盤放嘅二手樓反而跟隨新盤癲價出售，所以先會有百零呎嘅二手樓接連創新高。
當日高明另一預言係「新盤100呎以下嘅樓會變得普遍，然後啲人繼續買，偏遠地區都仲要住劏房會變成新常態」。點知發展商俊和即刻表演喺屯門賣128呎嘅劏房，仲要「歪理當真理」咁話「皇帝都係瞓張床」。曾幾何時發展新市鎮，區內單位面積大過市區，用嚟吸引市區嘅人搬入去，𠵱家偏遠地區嘅樓仲細過市區，只可以用倒行逆施嚟形容。
辣招最成功之處，就係挾升樓價，令發展商賺盡，仲要有無數未上車準買家覺得係德政而支持。辣招喺歐債危機、新興市場走資、QE退市、美國加息，種種危機之中削減供應，保住樓價。辣招嘅目的，就係要令樓價上升。醒未呀，港豬？
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com